Հայաստանը կարողանում է խնդիրներ ստեղծել Թուրքիայի համար, թուրք վերլուծաբան

Tert.am- 5-9-23009- Թուրքական «Ռադիկալ» թերթի լրագրող Իշմետ Բերքանն իր հոդվածում անդրադարձել է հայ-թուրքական հարաբերությունների խնդրին։ Լրագրողը, ուսումնասիրելով հայ-թուրքական Արձանագրությունները նախաստորագրելուց հետո արձագանքները թե Թուրքիայում, թե Հայաստանում, մեկնաբանում է Թուրքիայի արտաքին և ներքին ուղեգիծը՝ մասնավորապես նշելով, որ «Թուրքիան փորձում է լուծել որոշ արմատացած արտաքին և ներքաղաքական խնդիրներ և, հետևաբար, խաղաղություն հաստատել թե երկրի ներսում, թե տարածաշրջանում»։ Սակայն, ինչպես կարծում է լրագրողը, «Հայաստանը, հանդիսանալով փոքր երկիր, որի անունը հազվադեպ է արծարծվում, այնուամենայնիվ, կարողանում է խնդիրներ ստեղծել Թուրքիայի համար աշխարհում։ Այն փաստը, որ հայ-թուրքական խնդիրը կարող է լուծվել արդար և խելամիտ մեթոդների միջոցով, ոչ մեկին ամենևին էլ չի կարող վնասել, այլ ընդհակառակը՝ օգուտներ կարող է բերել։ Սակայն մեր երկրում թվում է, որ ոչ միայն քաղաքական գործիչները, այլև հոդվածագիրները քաջ գիտակցում են, որ նրանք պարտավոր են չհամաձայնել երկրի կառավարության գործողությունների հետ՝ աստիճանաբար սուր քննադատության ենթարկելով վերջիններիս քայլերը»։