«ԱԶԳ», 21-01-2011- Թուրքիայի ժանդարմերիայի հրամանատար, բանակի գեներալ Նեջդեթ Օզալի Բաքու կատարած այցի վերաբերյալ պաշտոնական տեղեկատվությանը զուգահեռՙ ադրբեջանական որոշ լրատվամիջոցներ փոխանցում են ուշադրության արժանի ակնարկներ: Ավելի բացախոս է գտնվել «Ենի Մուսավաթ» ընդդիմադիր թերթը: Հունվարի 20-ի համարում տեղ գտած «Ստեղծվում է թուրք-ադրբեջանական համատեղ ռազմական կենտրոնակայան» խորագրի ներքո հրապարակման մեջ պարբերականը մասնավորապես գրում է. «Խմբագրություն մտած տեղեկությունների համաձայն, Ադրբեջանի եւ Թուրքիայի գեներալիտետը գրավյալ տարածքները վերադարձնելու համար յուրաքանչյուր պահի հնարավոր մարտական գործողությունները կառավարելու, դրանք ինչ սցենարով իրականացնելու վերաբերյալ քննարկումներ է իրականացնում: Տեղեկացվում է նաեւ, որ նկատի է առնվում ռազմական գործողությունները կառավարելու համար Բաքվում թուրք գեներալների մասնակցությամբ համատեղ կենտրոնակայան ձեւավորելու հնարավորությունը»:Թերթն այնուհետեւ պարզաբանում է, որ «տեղացի եւ միջազգային փորձագետների կարծիքովՙ Ղարաբաղում սկսվելիք երկրորդ պատերազմը կարող է ընթանալ մի քանի սցենարով»: Ըստ այդմ, ամենահնարավորն է դիտվում «կարճաժամկետ եւ արագընթաց ռազմագործողությունը, սակայն ի սկզբանե պատերազմ սկսվելու դեպքում իրադարձությունների հնարավոր ընթացքը դժվար է ճշտել»: Թերթի տեղեկացվածությամբ, պատերազմի մի քանի տարբերակ է մշակվել: Դրանց համակարգչային մոդելավորումներն անցյալ տարի պաշտպանության նախարարությունում քննարկվել են Իլհամ Ալիեւի մասնակցությամբ: Ըստ «Ենի Մուսավաթ»-ի, այդ բոլոր տարբերակների մասին իրազեկված է նաեւ թուրքական ԶՈՒ հրամանատարությունը, եւ «պատերազմի դեպքում թուրք գեներալները նույնպես մասնակից կարվեն զորքերի կառավարմանը»:
Հնարավոր է` սա ընդդիմադիր թերթի կողմից պարզ սադրանք է իշխանությունների դեմ: Բայց եւ չի կարելի ուշադրությունից դուրս թողնել, որ «Մուսավաթ»-ում վերջին ժամանակներս տեղի են ունեցել շատ սկզբունքային գործընթացներ. իշխանությունների հետ արմատական հակասության մեջ գտնվող մի շարք գործիչներ հեռացել են կուսակցությունից: Դա կարծես խոսում է այն մասին, որ «Մուսավաթ»-ը կարող է ընդունել «կառուցողական ընդդիմություն դառնալու» մասին որոշում: Եթե ներքաղաքական զարգացումների մեջ առկա է այդ գործոնը, ապա չի բացառված, որ իշխանություններն իրենց համար ցանկալի արտաքին քարոզչական որոշ նուրբ խնդիրներ մատուցեն «ընդդիմության սադրանքի» փաթեթավորմամբ:
Այսպես թե այնպես` իրողություն է, որ անցյալ ամռանը Բաքվում Թուրքիայի եւ Ադրբեջանի միջեւ ստորագրվել է ռազմավարական համագործակցության պայմանագիր, որի մանրամասնությունները պահվում են խիստ գաղտնի: Շատ ուշագրավ է, որ հնարավոր պատերազմին թուրքական կողմի ներգրավվածության մասին «Ենի Մուսավաթ»-ի տեղեկատվությունը մատուցված է այն հավանականությամբ, որ «եթե ռուսներն աջակցեն Հայաստանին, ապա Թուրքիան էլ կպաշտպանի Ադրբեջանին», ինչը թերեւս հասկանալի է դարձնում, թե ինչու Հայաստանում ռուսաստանյան ռազմակայանի տեղակայման ժամկետը երկարաձգելու մասին հայ-ռուսական համաձայնությանն անմիջապես հետեւեց Գյուլի այցը Բաքու, որի ընթացքում էլ կողմերն ստորագրեցին թուրք-ադրբեջանական` արդեն նշված պայմանագիրը:
ՎԱՀՐԱՄ ԱԹԱՆԵՍՅԱՆ
Tehran Time
Yerevan Time
No comments:
Post a Comment