ԻՆՉ Է ԼԻՆԵԼՈՒ ԱՊՐԻԼԻ 28-ԻՆ

Հայ Ազգային Կոնգրեսի Գյումրիի կառույցի ղեկավար, գնդապետ Աշոտ Զաքարյանի հետ զրուցեցինք Ազատության հրապարակում

-Ազատության հրապարակը երկրորդ անգամ վերանվաճելն ի՞նչ էր նշանակում:

-Ես փորձեմ դուրս գալ էմոցիոնալ դաշտից: Փետրվարի 17-ից սկսած մեր յուրաքանչյուր հերթական հանրահավաք լուրջ քայլ է դեպի վերջնական հաղթանակ: Բացառություն չէ մեր այսօրվա հանրահավաքը, բացառություն չէ մեր հերթական մուտքը Ազատության հրապարակ: Մենք հաստատուն քայլերով մոտենում ենք վերջնական հաղթանակի:

-Իշխանություններն ու իշխանական քարոզչամեքենան այս ամենը ներկայացնում է որպես պայմանավորվածության արդյունք, այլապես ոստիկանությունն այդքան հեշտ չէր հանձնի հրապարակը:
-Այս ժողովրդին դիմակայելն ուղղակի անհնար է: Բացի այդ, տրամաբանական է իշխանությունների կողմից նման խոսակցությունների տարածումը ժողովրդի մեջ, նպատակ ունենալով վարկաբեկել Հայ Ազգային Կոնգրեսին, փոշիացնելու համար Կոնգրեսի մարդկային ռեսուրսը: Ես չեմ զարմանա, եթե առաջիկայում նոր այլ մեղադրանքներ հնչեն: Բայց այդ ամենին պետք չի լուրջ վերաբերվել, քանի որ սա հիվանդ տրամաբանության արդյունք է:

-Շատ է խոսվում վերջնական հաղթանակի մասին: Ի վերջո, ձեր կարծիքով, այդ հաղթանակը հեռո՞ւ է, թե ոչ:
-Ես համոզված եմ` վերջնական հաղթանակի հասնելը շատ մոտ է: Մենք վերջնական հաղթանակ ասելով նկատի ունենք նախագահական եւ խորհրդարանական արտահերթ ընտրությունները: Եվ դա սարերի հետեւում չէ: Պարզապես, պետք է մի փոքր համբերությամբ զինվել: Իհարկե, չսպասել: Ամեն օր գործել է պետք: Եվ ՀՀ յուրաքանչյուր քաղաքացի իր մասնակցությունը պետք է բերի: Որքան շատ այս գիտակցությամբ առաջնորդվեն մեր քաղաքացիները, այդքան վերջնական հաղթանակի հասնելը շուտ կլինի, ընդամենը օրերի խնդիր:

-Այս իշխանությունների օրոք հնարավո՞ր է անարյուն իշխանափոխություն:
-Ես կարծում եմ` այդ ռեսուրսը դեռ սպառված չէ` սահուն, առանց ցնցումների, առանց արյունահեղության հասնել արտահերթ ընտրությունների ու իշխանափոխության: Բայց միեւնույն ժամանակ չեմ բացառում ցանկացած իրավիճակ, ցանկացած զարգացում: Պետք է պատրաստ լինել ամենածայրահեղ տարբերակին անգամ: Բայց կրկնում եմ` հանգիստ իշխանափոխության ռեսուրսը դեռ սպառված չէ:

-Իշխանությունների քայլերը` որոշ ոստիկանների ձերբակալություն, վարչապետի այցերը գյուղեր, Սերժ Սարգսյանի հանձնարարականները, ձեր կարծիքով, իմիտացիա՞ է:
-Հայաստանի Հանրապետությունում վերջին 12-13 տարիների ընթացքում որեւէ բարեփոխում չի իրականացվել: Իսկ այն միջոցառումները, որ իրականացվել են բարեփոխում անվան տակ, իրականում չարեփոխումներ էին: Իհարկե, այդ քայլերը միտված են ժողովրդի ընդվզումը կասեցնելուն: Բայց, քանի դեռ շարքային քաղաքացին իր մաշկի վրա չի զգացել այդ ենթադրյալ բարեփոխումների արդյունքը, թեկուզ շատ չնչին կերպով, ուրեմն որեւէ լիցքաթափման, ընդվզումը կանխելու մասին խոսելն ավելորդ է: Քանի որ այս ամենը մշտապես կրել է իմիտացիոն բնույթ, անարդյունավետ միջոցառումներ են:

-Լեւոն Տեր-Պետրոսյանն իր ելույթում հայտարարեց. «Մենք դեռեւս հակված չենք իշխանության հետ վերջնագրի լեզվով խոսելու, բայց ժողովրդի համբերությունն էլ չափ ու սահման ունի։ Ապրիլի 28-ը պետք է դառնա կա՛մ երկխոսության սկզբնավորման, կա՛մ էլ՝ իշխանության ու հասարակության վերջնական ջրբաժանի օր»։ Ձեր կարծիքով, ապրիլի 28-ին ի՞նչ կլինի:
-Իշխանությունների` վերջին մի քանի տարիների գործողությունների մեջ որեւէ տրամաբանություն չկա: Եվ դժվար է հավատալ, որ նրանք կունենան այնքան բանականություն, որ հասարակության հետ սկսեն երկխոսություն: Ես կարծում եմ` ապրիլի 28-ը վերջնական ջրբաժան է դառնալու իշխանության եւ հասարակության միջեւ:

-Եվ ի՞նչ զարգացումներ կարելի է ակնկալել այդ ժամանակ:
-Ցանկացած զարգացում կարելի է ակնկալել, անգամ ամենածայրահեղ դրսեւորումները, հաշվի առնելով հեղափոխական իրավիճակը Հայաստանում: Բայց ի վերջո վերջնական որոշումը կայացվելու է հանրահավաքի ժամանակ. Հայ Ազգային Կոնգրեսի հանրահավաքները վերածվել են հասարակական ֆորումի, որտեղ որոշումները կայացվում են ժողովրդի քվեարկությամբ:

Հարցազրույցը վարեց ԱՐՄԱՆ ԳԱԼՈՅԱՆԸ«Լրագիր» 9-4-2011.