«Ազատություն» .27-1-2009- Ադրբեջանի մայրաքաղաքի իշխանությունները այսօր պաշտոնական հաղորդագրություն են տարածել Բաքվի կոմիսարների աճյունների վերահուղարկավորման վերաբերյալ:
Համաձայն հաղորդագրության, կոմիսարների աճյունները, որոնք հանգչում էին Բաքվի կենտրոնում գտնվող զբոսայգու տարածքում, վերահուղարկավորվել են քաղաքի գերեզմանոցներից մեկում` «մահմեդական, քրիստոնյա եւ հրեա հոգեւորականների մասնակցությամբ եւ համապատասխան կրոնական ծիսակատարություններով»:
ԻՏԱՌ-ՏԱՍՍ գործակալության փոխանցմամբ` մասնագետները պատրաստվում են հետազոտություն անցկացնել աճյունների նույնականացման նպատակով, քանի որ թաղման նախկին վայրում հայտնաբերվել է ոչ թե 26, այլ 23 դագաղ:
Բաքվի կոմունան, որում ընդգրկված էին հայ, ադրբեջանցի, վրացի եւ այլ ազգերի հեղափոխական գործիչներ, ստեղծվել էր 1918 թվականին, այն ղեկավարում էր Ստեփան Շահումյանը: Ըստ խորհրդային պատմագրության, 26 կոմիսարները գնդակահարվել են 1918 թվականի սեպտեմբերին Կասպից ծովի մերձակա ավազուտներում: Խորհրդային կարգերի հաստատումից հետո նրանց աճյունները տեղափոխվել են Բաքու եւ վերահուղարկավորվել քաղաքի կենտրոնում, որտեղ 1960-ականների վերջին կառուցվել էր 26 կոմիսարների հուշահամալիրը: 1990-ականների սկզբներին հուշահամալիրի հավերժական կրակը մարվել էր, համալիրը` մասամբ ապամոնտաժվել:
Ըստ քաղաքապետարանի ծրագրի, նախկին հուշահամալիրի տարածքում կառուցվելու է ստորգետնյա ավտոկայանատեղի:
Tuesday, January 27, 2009
Subscribe to:
Post Comments (Atom)
Tehran Time
Yerevan Time
No comments:
Post a Comment