Թուրքական Բուրսայում ստորագրահավաք՝ ընդդեմ Սերժ Սարգսյանի այցի

News.am. 29-9-2009- Թուրքիայի Բուրսա քաղաքում սեպտեմբերի 29-ից թուրքական հասարակության տարբեր ոլորտները ներկայացնող արհմիությունը` Kamu-Sen-ը, կազակերպել է ստորագրահավաք ընդդեմ Հայաստանի նախագահ Սերժ Սարգսյանի Բուրսա այցելության։ Թուրքական Kamu-Sen-ի կողմից կազմակերպված ստորագրահավաքին աջակցել են նաեւ թուրքական եւ ադրբեջանական այլ կազմակերպություններ։ Kamu-Sen-ի Բուրսայի նահանգային ներկայացուցիչ Սելչուկ Թյուրքօղլուն ասել է, որ Սերժ Սարգսյանը երկու երկրների ազգային հավաքականների ֆուտբոլային խաղը դիտելու համար հրավիրվել է Բուրսա, սակայն Հայաստանի նախագահը դա վերածել է շանտաժի եւ պահանջում է իր գալուց առաջ բացել սահմանները։ Թյուրքօղլուն պնդում է, որ Թուրքիան հսկա պետություն է եւ չպետք է ընկրկի փոքրիկ Հայաստանի շանտաժի առաջ։ Նա նշել է, որ իրենք երեք օրում նախատեսում են հավաքել 50 հազար ստորագրություններ, որոնք կուղարկվեն թուրքական խորհրդարան։ NEWS.am-ը հիշեցնում է, որ ավելի վաղ, երբ նախատեսված էր Թուրքիա-Հայաստան ֆուտբոլային պատասխան հանդիպումը անցկացնել Կայսերիում, այնտեղ հավաքեցին մոտ 250 հազար ստորագրություն՝ ընդդեմ այդ խաղը Կայսերիում անցկացնելուն եւ հայ-թուրքական սահմանի բացման։ Այսուհանդերձ, թուրք ֆուտբոլասերների մի կազմակերպություն հայտարարել էր, որ իրենք պատրաստ են դիմավորել եւ իրենց տներում պատվել հայ ֆուտբոլասերներին։