ՀԱՆՑԱԳՈՐԾԸ ԴԵՌ ՉԻ ԽՈՍՏՈՎԱՆԵԼ

«Լրագիր» 27-10-2009- Այսօր լրանում է 1999թ. հոկտեմբերի 27-ի ոճրագործության 10-րդ տարելիցը: Խորհրդարանում այսօր փորձեցինք պարզել, թե կազմակերպիչների մասով որքանո՞վ են փարատվել կասկածները: Գալուստ Սահակյան ԱԺ ՀՀԿ խմբակցության ղեկավար -Փարատվե՞լ են ձեր կասկածները հոկտեմբերի 27-ի կազմակերպիչների առումով: -Չեմ կարծում, որ փարատվել են: Ես, ինչպես տարիներ շարունակ եմ ասել, հոկտեմբերի 27-ի ոճրագործության կազմակերպիչներ կան: -Եվ ովքե՞ր են այդ կազմակերպիչները: -Նրանց օտար ափերում պետք է որոնել: -Իշխանությունները բավարար ջանք գործադրեցի՞ն կազմակերպիչներին բացահայտելու համար: -Ոչ միայն իշխանությունները, այլեւ ողջ քաղաքական ուժերը, այդ առումով այսօր իշխանություններին քննադատողները հասու էին եւ փորձեցին որոշակիորեն արդյունավետ գործ անել: Սակայն կազմակերպիչների հարցը մնում է բաց, քանի որ մենք դեռ այն ամուր պետությունը չենք, որ օտար ափերում որոնենք, թե ովքեր են կազմակերպիչները: -10 տարին արդյո՞ք բավարար ժամանակ չէր՝ կազմակերպիչներին հայտնաբերելու համար: -Ես կարծում եմ, որ փնտրելը զգացական դաշտում չպիտի անել, այն լուրջ ներուժ է պահանջում՝ սարքեր, մեծ ծախսեր եւ այլն, այն ամենը, ինչ անհրաժեշտ է օպերատիվ գործողությունների համար: Մենք պետություն ենք դարձել, դեռեւս չենք կարողանում ցեղասպանության խնդիրները լուծել: Հզոր Հայաստանի դեպքում բոլոր խնդիրները կլուծվեին: -Հոկտեմբերի 27-ից անմիջապես հետո ՀՀԿ եւ ՀԺԿ վերնախավը համատեղ ասուլիսում պահանջեց Սերժ Սարգսյանի եւ մի շարք այլ բարձրաստիճան պաշտոնյաների հրաժարականը: Այսօր Սերժ Սարգսյանը ՀՀԿ նախագահն է, այն կուսակցության ղեկավարը, որը ժամանակին իր հրաժարականն էր պահանջում: -Բնականաբար, շփոթն այնպիսին էր, վիճակն այնքան անակնկալներով լեցուն, որ կասկածամտությունը բոլորի մեջ կար… չեմ կարծում, որ դա ակտիվ միջոցառում էր, համենայն դեպս: -Իսկ ի՞նչ եք կարծում այն ժամանակ նախագահի պաշտոնը զբաղեցնող Ռոբերտ Քոչարյանն ու ԱԱ նախարար Սերժ Սարգսյանը քաղաքական պատասխանատվություն կրո՞ւմ են կատարվածի համար: -Բնականաբար, ցանկացած երեւույթի, իրադարձության համար իշխանությունները պատասխանատվություն կրում են: Մեղավորները միշտ այլոք են լինում, բայց օրվա իշխանությունն է պատասխանատվություն կրում: Էդուարդ Շարմազանով, ՀՀԿ խմբակցության քարտուղար -Հոկտեմբերի 27-ի ոճրագործությունից 10 տարի անց փարատվե՞լ են ձեր կասկածները ահաբեկչության կազմակերպիչների առումով: -Սա հայոց նորագույն պատմության մեջ ամենամեծ ոճրագործություններից մեկն էր, սպանվեցին 7 պետական գործիչներ, որոնցից մեկը՝ Սպարապետ Վազգեն Սարգսյանը ՀՀԿ առաջնորդն էր: Հոկտեմբերի 27-ը ուղղված էր ազգի եւ պետության անվտանգության դեմ: Այդ ոճրագործության հետեւանքով սպանվեցին այն գործիչները, որոնք մեծ լումա ունեին պետականության ամրապնդման համար, եւ պատահական չէ, որ այդ գործիչներից երկուսը՝ Կարեն Դեմիրճյանն ու Վազգեն Սարգսյանը ազգային հերոսներ են: Ինչ վերաբերում է կազմակերպիչներին, ապա ես ինֆորմացիա չունեմ: Ես չեմ կարող այս առնչությամբ բան ասել: Հույս ունեմ, որ եղած հարցականներն իրենց պատասխանը կստանան. Ոճրագործները՝ այդ ստահակները դատապարտվել են, նրանք ողջ են: Կարեւորն այն է, որ մենք մեր գործերով վառ պահենք Սպարապետի եւ մյուս զոհերի հիշատակը: -Հոկտեմբերի 27-ից անմիջապես հետո ՀՀԿ եւ ՀԺԿ վերնախավը համատեղ ասուլիսում պահանջեց Սերժ Սարգսյանի եւ մի շարք այլ բարձրաստիճան պաշտոնյաների հրաժարականը: Այսօր Սերժ Սարգսյանը ՀՀԿ նախագահն է, այն կուսակցության ղեկավարը, որը ժամանակին իր հրաժարականն էր պահանջում: -Այն ժամանակ քաղաքական այլ իրավիճակ էր, հրաժարական պահանջելը չէր նշանակում, որ Սերժ Սարգսյանի դեմ էին: Իսկ, Սերժ Սարգսյանը մշտապես եղել է ՀՀԿ-ի համախոհ, Սերժ Սարգսյանն ու ՀՀԿ-ն մշտապես քայլել են իրար հետ: Իսկ ես ուզում եմ հիշեցնել Վազգեն Սարգսյանի խոսքերը Սերժ Սարգսյանի մասին. “Դժվար թե մեկը գտնվի, որ կասկածի տակ առնի Սերժ Սարգսյանի ազնվությունը, հայրենասիրությունը, քաջությունն ու պրոֆեսիոնալիզմը”: -Իսկ ի՞նչ եք կարծում այն ժամանակ նախագահի պաշտոնը զբաղեցնող Ռոբերտ Քոչարյանն ու ԱԱ նախարար Սերժ Սարգսյանը քաղաքական պատասխանատվություն կրո՞ւմ են կատարվածի համար: -Երկրում թե լավի եւ թե վատի համար պատասխանատու է քաղաքական իշխանությունը՝ սկսած երկրի նախագահից, ԱԺ նախագահից, վարչապետից, նախարարներից, խորհրդարանից: ՀՀԿ-ն երբեք չի հրաժարվել իր պատասխանատվությունից: Սակայն պատասխանատվությունն ու մեղավոր լինելն այլ հասկացություններ են: Ամեն ինչի՝ եւ լավի, եւ վատի համար պատասխանատու են իշխանությունները, սակայն դա չի նշանակում, որ նրանք մեղավոր են: Դրանք տարբեր հասկացություններ են: Վարդան Այվազյան ՀՀԿ խմբակցության պատգամավոր -Հոկտեմբերի 27-ի ոճրագործությունից 10 տարի անց փարատվե՞լ են ձեր կասկածները՝ ահաբեկչության կազմակերպիչների առումով: -Իմ խորին համոզմամբ, տվյալ պարագայում կասկածները միանշանակ փարատվել են: Դրան զուգորդված բոլոր գործընթացները հստակ ապացուցեցին, որ ոճրագործության իրականացնողները հանդիսանում են նաեւ կազմակերպիչները: Կասկածները, որ ոճրագործությունն այստեղից է զուգորդված, միանշանակ փարատված են: -Այսինքն՝ Նաիրի Հունանյանն ու իր հանցախումբը միայնա՞կ են գնացել այդ քայլին: -Այո… կարող է քաղաքական զարգացումների հետ կապված դրսի ուժերին ձեռնտու չլիներ կայուն քաղաքական միավորի գոյությունը, մեր պետության զարգացումը: Եվ մեր պետության զարգացմանը դեմ ուժեր միշտ էլ առկա են, բայց կազմակերպիչներին ներսում միանշանակ փնտրել պետք չէ: Ուղեկցվող գործընթացները՝ բոլոր քաղաքական ելեւէջներով ցույց տվեցին, որ չկան հոկտեմբերի 27-ի կազմակերպիչներ: Ստեղծվել էին բոլոր հնարավորությունները, որ բացահայտվի ոճրագործությունը: Այնպես որ, որպես Այվազյան Վարդան, որպես հոկտեմբերի 27-ի գործընթացների մասնակից, այդ ամենը միանշանակ է ինձ համար: -Հոկտեմբերի 27-ից անմիջապես հետո ՀՀԿ եւ ՀԺԿ վերնախավը համատեղ ասուլիսում պահանջեց Սերժ Սարգսյանի եւ մի շարք այլ բարձրաստիճան պաշտոնյաների հրաժարականը: Այսօր Սերժ Սարգսյանը ՀՀԿ նախագահն է, այն կուսակցության ղեկավարը, որը ժամանակին իր հրաժարականն էր պահանջում: -Ես շատ լավ հիշում եմ մարտի 3-ի այդ հայտնի ասուլիսը: Սերժ Սարգսյանը, որ զբաղեցնում էր ԱԱ նախարարի պաշտոնը, այդ ժամանակ արդդեն հրաժարական էր տվել, ոստիկանապետը եւս հրաժարական էր ներկայացրել: Եվ ստեղծվել էին բոլոր հնարավորությունները՝ բացահայտելու համար: Ինչ վերաբերում է հարցին, որ այսօր Սերժ Սարգսյանը ՀՀԿ նախագահն է, ապա դա բնականոն ընթացք է: ՀՀԿ-ն Սերժ Սարգսյանին ընտրել է որպես ՀՀԿ նախագահ, առաջադրել է նախագահի թեկնածու եւ որպես նրա թիմակիցներ պաշտպանում ենք Սերժ Սարգսյանին եւ նրա ներկայացրած կառավարության ծրագիրը: Ես հիշում եմ, թե 1998թ. Վազգեն Սարգսյանն ինչ էր ասում Սերժ Սարգսյանի մասին, եւ այսօր չեմ կարծում, որ այս իրավահաջորդությունը չի համապատասխանում, ընդհակառակը, լրացնում են իրար: -Իսկ ի՞նչ եք կարծում այն ժամանակ նախագահի պաշտոնը զբաղեցնող Ռոբերտ Քոչարյանն ու ԱԱ նախարար Սերժ Սարգսյանը քաղաքական պատասխանատվություն կրո՞ւմ են կատարվածի համար: -Միանշանակ այո, եւ այդ քաղաքական պատասխանատվությունից ելնելով էլ նրանք փորձեցին մեղմել իրավիճակն ու այդ ժամանակահատվածն առանց թոհուբոհի, շատ ճկուն կերպով անցնել: Քոչարյանի քաղաքականության հետեւանքով Վազգեն Սարգսյանի եղբայրն ու նրա մերձավոր շրջապատը զբաղեցրին քաղաքական ու ուժային պաշտոններ եւ ողջ այդ գործընթացներն իրենց ձեռքը վերցրին: Ի՞նչ եք կարծում՝ Վազգեն Սարգսյանի բարեկամները նախանձախնդիր չե՞ն եղել բացահայտման համար: -Իհարկե, նախանձախնդիր եղել են, սակայն կարճ ժամանակ անց նրանք պաշտոնանկ արվեցին ու մեկուսացվեցին: -Այդ պաշտոնանկությունը լրիվ այլ կոնտեքստում է եղել… բյուջեի կատարողականը պրավալի էր գնում, եւ սոցիալական բումի սպառնալիք կար: Արամ Սաֆարյան, ԲՀԿ խմբակցության քարտուղար -Հոկտեմբերի 27-ի ոճրագործությունից 10 տարի անց փարատվե՞լ են ձեր կասկածները՝ ահաբեկչության կազմակերպիչների առումով: -Ես կարծում եմ, որ մեր հասարակության մեջ կասկածներ կան, որոնք չեն փարատվել: Սա իրողություն է, որը պետք է հաշվի առնել: Ես կարծում եմ, որ բոլոր պետական ղեկավարները, որոնք պատասխանատու էին այս գործընթացը հանրության համար մինչեւ վերջ թափանցիկ դարձնելու հարցում, պետք է մտածեին եւ այն ժամանակ եւ նաեւ այսօր: Դա կարող էին անել օրինակ՝ քննության նյութերը հրապարակելու եւ հանրությանը հայտնի դարձնելու տեսքով: -Իսկ ի՞նչ եք կարծում այն ժամանակ նախագահի պաշտոնը զբաղեցնող Ռոբերտ Քոչարյանն ու ԱԱ նախարար Սերժ Սարգսյանը քաղաքական պատասխանատվություն կրո՞ւմ են կատարվածի համար: -Ոչ: Ես այն ժամանակ էլ եմ ասել, որ չեմ տեսնում մի թերություն, որ կիսատ արվեց որեւէ գործ՝ բացահայտման համար: Ամենապարզունակ բանը ամեն ինչ երկրի նախագահի վրա բարդելն է: Սակայն սա չի նշանակում, որ պաշտոնյաները պատասխանատու չեն կատարվածի հետեւանքով հասարակության բեեւեռացումը, թշնամանքն ու հետեւանքները վերացնելու ուղղությամբ բավարար քայլեր չկատարելու համար: -ՀՀԿ-ականներն ասում են, որ այն ժամանակվա իշխանությունները, այդ թվում՝ Սերժ Սարգսյանը քաղաքական պատասխանատվություն են կրում կատարվածի համար: -Ես այդպես չեմ մտածում: Ես նույնն այն ժամանակ էլ եմ ասել: -Ռաֆիկ Պետրոսյան- ՀՀԿ խմբակցության պատգամավոր -Հոկտեմբերի 27-ի ոճրագործությունից 10 տարի անց փարատվե՞լ են ձեր կասկածները՝ ահաբեկչության կազմակերպիչների առումով: -Ես կարծում եմ, որ ահաբեկչության հետեւում կազմակերպիչներ կան, որոնք դեռեւս չեն բացահայտվել: -Ինչը խանգարեց բացահայտմանը: -Հանցագործները դեռեւս չեն խոստովանել: Նրանք մեղքը վերցրել են իրենց վրա: Նախաքննական մարմինն էլ ամեն միջոց ձեռնարկել է, բայց չի կարողացել հայտնաբերել կազմակերպիչներին: Եվ կասկածներ կան, ու քանի դեռ չի բացահայտվել, կասկածները կշարունակվեն: -Իսկ ի՞նչ եք կարծում այն ժամանակ նախագահի պաշտոնը զբաղեցնող Ռոբերտ Քոչարյանն ու ԱԱ նախարար Սերժ Սարգսյանը քաղաքական պատասխանատվություն կրո՞ւմ են կատարվածի համար: -Ոչ: ԱԺ ղեկավարությունն անզգուշություն է ցուցաբերել եւ ԱԺ-ի շենք զինված մարդիկ են մտել: Պահպանության բաժինն է պատասխանատվություն կրում կատարվածի համար: -Իսկ ԱԱ նախկին նախարարը պատասխանատվություն կրո՞ւմ է: -ԱԱԾ-ն, իմ կարծիքով, ինչ-որ տեղ պատասխանատվություն կրում է կատարվածի համար, քանի որ ըստ շրջանառվող լուրերի, նրանց նախապատրաստելու մասին ինչ-որ բաներ հայտնի են եղել, եւ որը չի կանխվել: Հարցազրույցները վարեց ԱՐՄԱՆ ԳԱԼՈՅԱՆԸ