Շվեյցարիայի ԱԳՆ ղեկավարը վստահեցնում է, որ հայ–թուրքական և ղարաբաղյան գործընթացները շաղկապված չեն

Tert.am 19.11.2009 - Լեռնային Ղարաբաղի հակամարտության կարգավորման և հայ-թուրքական մերձեցման գործընթացները միմյանց հետ շաղկապված չեն, Trend News-ին հայտնել է Շվեյցարիայի ԱԳՆ ղեկավար, ԵԽ նախարարների խորհրդի նոր նախագահ Միշլեն Քալմի-Ռեյը: Նա անհրաժեշտ է համարում Ցյուրիխում ստորագրված Արձանագրությունների վավերացումը երկու երկրների խորհրդարանների կողմից: «Մենք հույս ունենք, որ և Հայաստանը և Թուրքիան առաջիկայում կվավերացնեն Արձանագրությորնները: Ղարաբաղյան հակամարտության կարգավորումը և հայ-թուրքական մերձեցումը պաշտոնապես միմյանց շաղկապված չեն»,- ասել է նա: Նրա խոսքերով` այս գործընթացները տարվում են զուգահեռաբար և միմյանցից անկախ: «Լեռնային Ղարաբաղի խնդրի կարգավորմամբ զբաղվում է ԵԱՀԿ Մինսկի խումբը: Մյուս գործընթացը նախատեսում է հայ-թուրքական հարաբերությունների կարգավորումը, որի միջնորդ է հանդիսանում Շվեյցարիան: Իհարկե, այս գործընթացներից մեկում դիտվող առաջընթացը կարող է ազդել մյուսի վրա»,- ասել է Քալմի-Ռեյը: