ԼՂՀ պաշտպանության նախարարությունն արձագանքել է ադրբեջանական ապատեղեկատվությանը

Tert.am 23.11.2009 - Համաձայն ԼՂՀ պաշտպանության նախարարության մամուլի ծառայության տարածած հաղորդագրության, նոյեմբերի 21-ից 22-ը և այսօրվա ընթացքում ղարաբաղա-ադրբեջանական զորքերի շփման գոտու մի շարք հատվածներում արձանագրվել են հրադադարի ռեժիմի խախտման դեպքեր։ Հակառակորդը փոքր տրամաչափի հրաձգային զենքերից և դիպուկահար հրացաններից գնդակոծել է Հորադիզ, Չախրլը, Աշաղը Աբդուռահմանլի, Լյալա-Իլագլի, Շխլար, Բաշ Քարվենդ, Լևոնարխ, Թալիշ և Թափ-Կարակոյունլու ուղղություններում տեղակայված ղարաբաղյան դիրքապահների հենակետերը։ «Հատկանշական է, որ այսքանից հետո, ադրբեջանական քարոզչամեքենան իր սովորությանը համաձայն, այսօր տեղեկություն է տարածել առ այն, թե իբր հրադադարի խախտման արդյունքում Թափ-կարակոյունլու գյուղի մերձակայքում հայ դիրքապահների կողմից խոցվել է ադրբեջանցի մեկ քաղաքացի։ Դա Բաքվի պաշտոնական քարոզչության մոգոնած է, որը չի համապատասխանում իրականությանը», - ասվում է ԼՂՀ ՊՆ մամուլի ծառայության հաղորդագրության մեջ։