Հունաստանը հիշեցնում է, որ թուրք-օսմանցիների համար Եվրամիությունում տեղ չկա

Panorama.am. 14-12-2009- «Օսմանիզմի գաղափարներով Եվրամիություն չեք կարողանա մտնել»,- Թուրքիային հասցեագրված նման հայտարարություն է արել Հունաստանի փոխարտգործնախարար Դմիտրիս Դրուչաշը: Թուրքական «Հյուրրիյեթ» (Hurriyet) օրաթերթի տեղեկացմամբ` Դրուչաշը «Proto Thema» թերթին տված հարցազրույցի ժամանակ ասել է. «Եվրոպական ժողովրդավարության հետ համեմատած` Թուրքիայի ժողովրդավարությունը դեռ անցնելիք երկար ճանապարհ ունի»: Հույն բարձրաստիճան պաշտոնյան ընդգծել է, որ թեև Թուրքիան համարձակ հայտարարություններ է անում Հայաստանի հետ հարաբերություննները կարգավորելու և քրդական հարցը լուծելու մասին, այնուամենայնիվ, գործնականում շոշափելի առաջընթաց կամ ձեռքբերում այդ ուղղությամբ դեռևս չկա: Հիշեցնենք, որ թուրքական «Սթարգյունդեմ» (StarGundem) կայքի տեղեկացմամբ` Թուրքիայի արտգործնախարար Ահմեթ Դավութօղլուն նոյեմբերի 24-ին հայտարարել էր. «Մենք օսմանցիներից մնացած ժառանգություն ունենք, ասել է թե` նոր օսմանցիներ ենք: Այո, մենք նոր օսմանցիներ ենք»: