Հայ-թուրքական գործընթացում «ապրիլը կլինի որոշիչ»

Aysor.am. 23-12-2009- «Թուրքիայում գործընթացները կարող են որոշ չափով ակտիվանալ մարտի վերջին ու ապրլին` հասկանալի պատճառներով»,- հայտնեց քաղաքագետ Ալեքսանդր Մարգարովը` պատասխանելով Aysor-ի այն հարցին, թե ե՞րբ Թուրիքայի խորհրդարանը հայ-թուրքական արձանագրությունների վավերացման ուղղությամբ ավելի հստակ քայլեր կձեռնարկի: Ըստ Ա. Մարգարովի, «ապրիլը կլինի որոշիչ` ցույց կտա` արդյոք դա իմիտացիո՞ն գործըթաց է թուրքական կողմից, թե իրական պատրաստակամություն` մտնելու գործնական փուլի մեջ»: Aysor-ի այն հարցին,թե ե՞րբ արձանագրությունները կներկայացվեն Ազգային ժողով, Ա. Մարգարովը պատասխանեց երկու «սցենարով»: Առաջինը, համաձայն ՀՀ պաշտոնական դիրքորոշման, արձանագրությունները Հայաստանում կվավերացվեն, եթե դրանք վավերացվեն Թուրքիայում: «Կա երկրորդ միտումը, որ համապատասխան ձգձգումների դեպքում` մենք կարող ենք դիմել միջազգային իրավունքին և համապատասխան ձևով կա'մ հետ կանչել մեր ստորագրությունը, կա'մ ուղղակի ասել, որ գործընթացը չի ստացել այն շարունակությունը, որն ակնկալվում էր Հայաստանում և այն տերություների կողմից, որոնք օժանդակում էին գործընթացի իրականացմանը»,- ամփոփելով խոսքը` հայտնեց Ա. Մարգարովը: