Առաջընթաց չապահովող հաղթանակ

Panorama.am.13-1-2010- Թուրքական Բուրսա քաղաքում ավարտվեց շախմատի աշխարհի թիմային առաջնությունը: Հայաստանի հավաքականը, թեպետ վերջին տուրում 3:1 հաշվով առավելության հասավ Եգիպտոսի ընտրանու նկատմամբ, այդուհանդերձ, չկարողացավ բարձրանալ մրցաշարային աղյուսակում և վերջնականապես հանգրվանեց 5-րդ հորիզոնականում` 12 միավոր արդյունքով: Նույնքան միավոր է վաստակել նաև Ադրբեջանի հավաքականը, սակայն մեր թիմին գերազանցում է անհատական միավորների քանակով: Ադրբեջանցիները, այսպիսով, 2:2 հաշվով ոչ-ոքի խաղալով ամերիկացիների հետ` զբաղեցրեցին չորրորդ հորիզոնականը: Աշխարհի չեմպիոնի կոչումը նվաճեցին ռուսները, ովքեր վերջին տուրում 3:1 հաշվով վստահ հաղթանակ տոնեցին Իսրայելի ընտրանու նկատմամբ: Նրանք վաստակել են 15 միավոր և մրցակցությունից դուրս են: Երկրորդ տեղը գրավեց ԱՄՆ-ի թիմը` 13 միավորով: Հնդկաստանի հավաքականը նույնպես 13 միավոր է վաստակել, սակայն անհատական միավորների քանակով 1 միավորով հետ է մնում ԱՄՆ-ի ազգային թիմից: Հաջորդ լրահոսում ավելի մանրամասնորեն կանդրադառնանք աշխարհի առաջնության արդյունքներին և մեր հավաքականի ելույթներին: 1. Ռուսաստան 24 2. ԱՄՆ 21,5 3. Ադրբեջան 22 4. Հնդկաստան 21 5. Հայաստան 20,5 6. Իսրայել 17 7. Հունաստան 17 8. Բրազիլիա 12,5 9. Եգիպտոս 12 10. Թուրքիա 11,5