Թուրքերը Հայոց ցեղասպանության ճանաչման հարցով հիմա ել շվեդներին են սպառնում

News.am. 16-2-2010- Շվեդիայում այցով գտնված թուրք խորհրդարանականները իրենց անհանգստությունն են հայտնել շվեդական խորհրդարանում կրկին հայտնված Հայոց ցեղասպանությունը ճանաչող օրինագծի կապակցությամբ։ Շվեդական խորհրդարանը նախատեսում է երկու շաբաթվա ընթացքում քվեարկության դնել թուրքերի կողմից հայերի եւ ասորիների դեմ իրականացրած ցեղասպանությունը ճանաչող օրինագիծ։ Թուրքիայի խորհրդարանի արտաքին հարաբերությունների հանձնաժողովի նախագահ Մուրադ Մերջանի ղեկավարած պատվիրակությունը շվեդական կողմին զգուշացրել է, որ հիշյալ բանաձեւը ընդունվելու պարագայում դժվարություններ կառաջանան թուրք-շվեդական հարաբերություններում եւ կվնասեն ստորագրված հայ-թուրքական արձանագրությունների վավերացման գործընթացին Թուրքիայի խորհրդարանում։ Zaman-ին տեղեկություններ հայտնած աղբյուրները նշում են, որ շվեդական իշխանությունները ցանկանում են, որ տվյալ օրինագիծը քննարկվի ոչ թե խորհրդարանում, այլ պատմական հանձնաժողովում, սակայն օրինագծի խորհրդարան անցկացումը կասեցնելու նրանց գործողությունները դժվար թե արդյունք տան։ Հիշյալ աղբյուրները նշում են նաեւ, որ նման օրինագծեր ամեն տարի մտնում են շվեդական խորհրդարան եւ մերժվում։