Հոկտեմբերի 27–ի գործով դատապարտված Համլետ Ստեփանյանը հանկարծամահ է եղել

2010թ. մայիսի 15-ին, ժամը 19։00-ի սահմաններում ՀՀ արդարադատության նախարարության «Նուբարաշեն» քրեակատարողական հիմնարկում իր անկողնում հանկարծամահ է եղել քրեական օրենսգրքի 300-րդ հոդվածի 1-ին մասով, 305-րդ հոդվածով, 34-305-րդ հոդվածներով, 217-րդ հոդվածի 2 մասի 2-րդ կետով, 133-րդ հոդվածի 2-րդ մասի 1-ին, 2-րդ և 6-րդ կետերով (1999թ. հոկտեմբերի 27-ին ԱԺ-ում տեղի ունեցած դեպքի առթիվ հարուցված քրեական գործով անցնող դատապարտյալ) 14 տարի ազատազրկման դատապարտված Համլետ Ստեփանյանը։ Դիակի նախնական զննությամբ բռնության հետքեր չեն հայտնաբերվել։ Նշանակվել է դատաբժշկական փորձաքննություն։ Մահվան հանգամանքները պարզելու ուղղութամբ տարվում է քննություն։ Դեպքի մասին իրազեկվել և իրականացվող աշխատանքներին մասնակցելու համար հրավիրվել է ՀՀ արդարադատության նախարարության քրեակատարողական հիմնարկներում և մարմիններում հասարակական վերահսկողություն իրականացնող դիտորդական խումբը: 2003թ. դեկտեմբերի 2-ին Երևանի Կենտրոն և Նորք-Մարաշ համայնքների առաջին ատյանի դատարանը ցմահ ազատազրկման էր դատապարտել 1999թ. հոկտեմբերի 27-ի ահաբեկչության զինված խումբի գլխավոր Նաիրի Հունանյանին և նրա հանցախմբի 5 անդամներին։ Համլետ Ստեփանյանը, որն անմիջականորեն չէր մասնակցել ԱԺ նիստերի դահլիճում տեղի ունեցած իրադարձություններին, դատապարտվել էր 14 տարվա ազատազրկման: Հետագայում ինքնասպանություն էր գործել ցմահ ազատազրկման դատապարտված Վռամ Գալստյանը: