ԼԿՏԻՈՒԹՅՈՒՆԸ ՊԵՏՔ Է ՊԱՏԺՎԻ

Հարցազրույց ԱԺ ՀՅԴ խմբակցության քարտուղար Արտյուշա Շահբազյանի հետ

-Ինչպես կմեկնաբանեք Գագիկ Բեգլարյանի եւ Արամ Կանդայանի հետ տեղի ունեցած միջադեպը եւ Երեւանի քաղաքապետի պաշտոնից Բեգլարյանի հրաժարականը:

-Տեղի ունեցածն արտառոց երեւույթ է. եկեք վերանանք անձերից, բայց մի երկրի առաջին դեմքի արարողակարգի ներկայացուցչին հենց նախագահին առնչվող պարտականությունները կատարելու համար դաժան ձեւով բռնության ենթարկելուն եթե չհետեւեր այն, ինչ հետեւեց, ապա կնշանակեր, որ մենք ոչ թե երկիր ենք, այլ` գազանանոց: Ես այստեղ այլ ելք չեմ էլ տեսնում: Եւ Գագիկ Բեգլարյանը, եւ մենք բոլորս այս հասարակության ծնունդն ենք: Այսինքն` եթե մի տեղ անօրինականության, բռնության համար կիրառվում են որոշակի միջոցառումներ, ապա պետք է նույնը տեսնենք նաեւ ընդհանրապես: Այսինքն` արդյոք նույնը կպատահեր, եթե բռնության ենթարկվեր պարզ մի քաղաքացի: Քանի այդպես չի լինի, մենք չենք կարող խոսել, որ այս երկրում փորձ է արվում հաստատել արդարություն:

-Հաջորդ հարցս հենց դրան էր վերաբերվում. եթե Գագիկ Բեգլարյանը կամ որեւէ այլ պաշտոնյա բռնության ենթարկեր ոչ թե նախագահականի աշխատակցին, այլ` հասարակ քաղաքացու, արդյոք դրան կհետեւեր նրա հրաժարականը:
-Համենայն դեպս մենք մինչեւ այսօր չենք տեսել, որ այդ տեսակ դեպքերը նման հետեւանք ունենան: Գուցե վերջին շրջանում ինչ-ինչ դեպքեր լինեն. 3 տարվա ազատազրկման են դատապարտել իր զինվորներին ծեծող, ծաղրի ենթարկող սպային, որի մասին կադրերը հայտնվել էին ինտերնետում: Բայց բոլորը պետք է հասկանան, որ անօրինականությունը, բռնությունը, լկտիությունն այս երկրում պետք է պատժվի ցանկացած անձի դեպքում, ցանկացած արարքի պարագայում:

-Ինքներդ իշխանությունների մոտ տեսնո՞ւմ եք կամք` լուրջ փոփոխությունների գնալու, նման երեւույթների հանդեպ անհանդուրժող գտնվելու առումով:
-Ես չեմ ուզում ասել, որ այդպես չի: Ես ուզում եմ հավատալ, որ ինչ-որ բան ուզում են փոխել: Կփոխվի` մենք ծափ կտանք, չի փոխվի` մենք կտեսնենք, որ սրանք պարզապես սուբյեկտիվ մոտեցումներ էին:

-Ձեր կարծիքով, այս ամենն ինչի հետեւանք է:
-Այս ամենը երկրում առկա անարխիկ, անպատժելիության մթնոլորտի, օրենքի ստորադասման հետեւանք է, որ մեզանում կա եւ առաջին տարին չէ, որ այդպես է: Արդեն 20 տարի է` այդ վիճակն է:

-Կցանկանայի անդրադառնանք նաեւ Գեւորգ Դանիելյանին արդարադատության նախարարի պաշտոնից ազատելուն. Ինչու նրան ազատեցին, երբ մարդ էր ծեծել նրա ստորադասը` ԴԱՀԿ ծառայության պետ Միհրան Պողոսյանը եւ որին նշանակելու եւ աշխատանքից ազատելու լիազորությունը ոչ թե նախարարինն է, այլ` նախագահինը:
-Ճիշտ չէ, որ ես դրա գնահատականը տամ. այն, ինչ պատճառաբանում էին նրան աշխատանքից ազատելու համար, բոլորս էլ հասկանում ենք, թե ինչ է նշանակում պաշտոնյայի համար լիարժեքորեն իրականացնել իր պարտականությունները: Բայց նաեւ հարց է առաջանում` իսկ ինչ է սպասվում նրան, որը պատժի արժանի արարքներ է թույլ տվել եւ որին չպատժելու համար պատժվել է նախարարը:

-Ինչ եք կարծում, ինչու Դանիելյանին են պատժել, ոչ թե Պողոսյանին. միգուցե ԴԱՀԿ պետը այնքան հզոր է, որ նրա վրա չեն կարող, գուցե նա թիկունք ունի:
-Միգուցե այդպես է: Ես չեմ բացառում:

-Դուք ասացիք, որ այս ամենը հետեւանք է երկրում առկա անպատժելիության մթնոլորտի: Ժամանակին ՀՅԴ-ն կոալիցիայի մաս էր կազմում, այդ առումով, ձեր պատասխանատվության բաժինն արդյոք ունեք այս ամենի մեջ, որպես այս իշխանություններին սատարած, իշխանության մաս կազմած ուժ:
-Երբ ասում ենք` սխալ եք գործում, միանգամից հակադարձում են` դու էլ ես սխալ… այսինքն` սրանով փորձ են անում արդարացնել սեփական մեղքը, սեփական սխալը: Սա ճիշտ մեթոդ չէ: Եւ հաջորդը` Դաշնակցությունը կառավարության մեջ մշտապես եղել է փոքրամասնություն: Մտածել, որ ամեն մի նախարարություն կառավարության մեջ կարող է լինել առանձին ու առանձին քաղաքականություն իրականացնել, դա եթե վարկաբեկում չի, ապա անգրագիտություն է: Եվ հետո` կառաջարկեմ բացել այն տարիների մամուլը եւ տեսնել, թե նման արտառոց դեպքերում ՀՅԴ-ի արձագանքն ինչպիսին է եղել, ու ընդհանրապես, երկրի ներքին վիճակի, բարոյական մթնոլորտի, կոռուպցիայի, տնտեսության ստվերայնության, կլանային համակարգի հետ կապված ինչպիսին է եղել մեր արձագանքը:

-Ուղղակի սատարելով իշխանություններին, արդյոք պատասխանատվություն չեք կրում ստեղծված վիճակի համար:
-Մենք սատարել ենք ծրագրեր, եւ եթե նայեք այդ տարիներին կառավարության գործունեությունը, կտեսնեք` հսկայական գործ է արվել մեր երկրում: Այդ գործին մենք սատարել ենք: Մնացած մասով մենք խնդիրներ ենք առաջադրել. Մեր առաջարկով ստեղծվեց հակակոռուպցիոն մարմին, ՀՀ-ն միացավ Գրեկոյի համաձայնագրին, ՀՅԴ-ական Բագրատ Եսայանը նախագահի խորհրդական էր` կոռուպցիայի դեմ պայքարի գծով: Այսինքն` այդ ամենն ասվել է, եւ մենք համագործակցել ենք եղած ծրագրերի առումով, եւ ասեմ` բավական արդյունավետ համագործակցել ենք:
«Լրագիր» 11-12-2010
Հարցազրույցը վարեց ԱՐՄԱՆ ԳԱԼՈՅԱՆԸ