Սպիտակ տունն անզոր է հայկական լոբբիի դեմ. ադրբեջանական մամուլ

Tert.am. 4-1-2011- ԱՄՆ նախագահ Բարաք Օբաման և Պետքարտուղարությունն անզոր են հայկական լոբբիի դեմ: Այս մասին է գրում ադրբեջանական Yeni Azerbaycan պարբերականը` ԱՄՆ արտաքին քաղաքականությանը նվիրված քննադատական հոդվածում, որը լայն արձագանք է գտել թուրքական մամուլում:
«Սպիտակ տունն ու Պետքարտուղարությունն անկարող են հայկական լոբբիի գործունեության դեմ: Ամերիկյան շահերն անհնար է դիտարկել` առանց հաշվի նստելու Կալիֆոռնիայի կամ այլ նահանգների հայկական Սփյուռքի կողմից առաջ քաշվող պահանջների հետ: Ասվածի վառ ապացույցն է յուրաքանչյուր տարի հայկական Սփյուռքի կողմից իրականացվող արշավը Հայոց ցեղասպանության ճանաչման համար: Ստացվում է` ամերիկյան արտաքին քաղաքականությունը դառնում է հայերի պատանդը»,- գրում է ադրբեջանական պարբերականը` ընդգծելով, որ ԱՄՆ-ում գործող հայկական լոբբին լուրջ խոչընդոտներ էր ստեղծում Օբամայի համար Մեթյու Բրայզային Բաքվում դեսպան նշանակելու հարցում:
«Այնպիսի տպավորություն է ստեղծվում` կարծես Միացյալ Նահանգների պես գերտերության արտաքին քաղաքականությունը ձևավորվում է ոչ թե Պետքարտուղարությունում, այլ Քիմ Քարդաշյանի ննջարանում կամ Քըրք Քրքորյանի գրասենյակում»,- գրում է Yeni Azerbaycan-ը` Վաշինգտոնին մեղադրելով երկակի ստանդարտների քաղաքականության համար:
«Գուանտանամոյի ռազմաբազան Միացյալ Նահանգների կողմից իրականացվող երկակի ստանդարտների քաղաքականության խորհրդանիշն է դարձել: Այդ բանտը ստեղծվել է 2002թ. հունվարին: Այն ժամանակ Աֆղանստանից այդ բանտ բերվեցին թալիբան շարժման 20 զինյալներ: Գուանտանամոյի կալանավորների նկատմամբ ամերիկյան վարչակազմի կողմից խոշտանգումներ էին իրականացվում: Բարաք Օբաման, 2009թ. ընտրվելով Միացյալ Նահանգների նախագահ, հրահանգեց փակել բանտը: Սակայն, ինչպես տեսնում ենք, բանտը մինչև հիմա փակված չէ և դեռ կշարունակի գործել»,- գրում է ադրբեջանական պարբերականը` ընդգծելով, որ «ԱՄՆ նախագահն այլևս աշխարհի առաջնորդը չէ»:
«Ակնհայտ է` Միացյալ Նահանգների նախագահն այլևս աշխարհի առաջնորդը չէ: Նախկին ԽՍՀՄ-ի պես մի պահ վերելք ապրող ԱՄՆ-ն արդեն անկարող է անգամ որևէ փոքր փոփոխություն իրականացնել աշխարհում: Դոլարն ուր որ է կմոտենա իր վախճանին: Wikileaks-ի արտահոսքի պատճառով վտանգված է նաև ամերիկյան դիվանագիտությունը: Ավարտվում է ամերիկյան ռազմուժի գերիշխանության ժամանակաշրջանը»,- գրում է ադրբեջանական թերթը` ընդգծելով, որ Միացյալ Նահանգները պետք է վերանայի իր քաղաքականությունը և որոշումներ կայացնի պետական շահերից ելնելով: