Նախարարը վտանգ չի տեսնում, որ Հայաստան եկող գազատարի բաժնեմասն օտարվի

Tert.am.15-2-2011- Վրացական իշխանությունները Հյուսիս-Հարավ գազատարի [որով գազը Ռուսաստանից ներկրվում է Հայաստան] մասով չեն գնա այնպիսի ճանապարհով, որ լարվածություն ստեղծեն Հայաստանի համար։ Այս մասին այսօր հրավիրած ասուլիսին հայտարարեց էներգետիկայի և բնական պաշարների նախարար Արմեն Մովսիսյանը։ Ըստ նրա՝ նույնիսկ Վրաստանի նավթագազային պետական կորպորացիայի 10-20% բաժնետոմսը բորսայի միջոցով վաճառելու պայմաններում դժվար թե գազատարը այլևս չշահագործվի ըստ նպատակայնության:
Նախարարը նշեց, որ գազամուղն ադրբեջանական ընկերության վաճառելու մասին լուրերը հիմնականում տարածում են ադրբեջանական լրատվամիջոցները։ «Վրացական աղբյուրներում նման բան, որ գազամուղը վաճառվելու է ադրբեջանական ընկերության, չենք գտել»,- ասաց նախարարը։
Նշենք, որ Վրաստանի կառավարությունը մտադիր է միջազգային բորսայում տեղաբաշխել Նավթագազային պետական կորպորացիայի բաժնետոմսերը: Ըստ Վրաստանի էներգետիկայի նախարար Ալեքսանդր Խետագուրիի՝ վաճառքի կհանվի կորպորացիայի բաժնետոմսերի 25%-ը: Կորպորացիայի եկամուտի կարևորագույն աղբյուրներից մեկը «Հյուսիս-Հարավ» գազամուղի տարանցման վճարի ստացումն է: Այս գազամուղով Հայաստանը Ռուսաստանից տարեկան ներկրում է շուրջ 2 մլրդ խմ բնական գազ։