Ադրբեջանի իշխանությունների հակաիսլամական քայլերն` ըստ «ՖԱՐՍ»-ի

Panorama.am. 13-7-2011- «Ադրբեջանում, որի բնակչության 96 տոկոսը մուսուլմաններ են, որի 85 տոկոսը կազմում են շիաները, իշխանությունների կարգադրությամբ դպրոցներում արգելվում է «հեջաբ» կրել, մզկիթներից արգելվում է բարձրախոսներով հնչեցնել «ազանի» կանչը, դադարեցվում են կրոնական-գիտական կենտրոնների գործունեությունը, ինչպես նաև Ադրբեջանի նախագահը ներկա է գտնվում հրեաների կազմակերպած տարատեսակ միջոցառումներին. հրեաները, ներթափանցելով այդ երկրի տարբեր ոլորտներ, հակաիրանական գործունեություն են ծավալում»: Այդ մասին տեղեկացնում է իրանական «ՖԱՐՍ» լրատվական գործակալությունը:
Հիշեցնենք, որ օրերս իրանական «արաննյուզ.իռ» կայքը, քննադատելով իսլամի հարցում Ադրբեջանի ղեկավարության վարած երկակի քաղաքանությունը, գրել էր. «Ադրբեջանի ԱԳ նախարար Էլմար Մամեդյարովը Իսլամական համագործակցության կազմակերպության (ԻՀԿ) նիստի ընթացքում մի կողմից նշում է, որ իր երկիրը կաջակցի ԻՀԿ երկրներին` կանխարգելելու հակակրոնական որևէ գործողություն, իսկ մյուս կողմից հենց իր երկրում պետական պաշտոնյաների կողմից վարվում է հակաիսլամական քաղաքականություն»:
Նկատենք, որ իրանցի բարձրաստիճան հոգևորականներն Ադրբեջանում թե հեջաբի արգելման, թե կրոնական գործիչների ձերբակալման և թե մզկիթների քանդման գործընթացի վերաբերյալ հաճախ են հանդես գալիս շատ խիստ քննադատական հայտարարություններով: