«Իրաքի իշխանությունները պետք է իմանան, որ Իրանի համբերությունը սահման ունի». իրանցի պատգամավոր

1in.am. 1-8-2011- Իրանական Nasim Online լրատվական կայքի հաղորդմամբ՝ Իրանի «Բասիջ» աշխարհազորայինների նախկին հրամանատար, Իրանի խորհրդարանի ներքին անվտանգության կոմիտեի անդամ Փարվիզ Սարվարին հայտարարել է. «Իրաքի իշխանությունները պետք է իմանան, որ Իրանի համբերությունը սահման ունի: Եթե Իրաքի ինքնավար Քրդստանի ղեկավարությունը անկարող է պայքարել PJAK խմբակցության դեմ, Իրանը կարող է վճռական քայլեր ձեռնարկել այդ ուղղությամբ»։
Հայտարարելով, որ շարունակվում են զինված ընդհարումները Իրանի պահակազորի և քրդական PJAK խմբակցության միջև՝ Սարվարին ավելացրել է. «Մինչև Իրաքի կենտրոնական իշխանության և Ինքնավար Քրդստանի զինված ուժերը չտեղակայվեն Իրան-Իրաք սահմանագծում ու չվերահսկեն սահմանների անվտանգությունը, Իրանի գործողությունները շարունակվելու են»։
Փարվիզ Սարվարին, անդրադառնալով այն փաստին, որ քրդական PJAK խմբակցության ղեկավար Աբդոլռահման Հաջահմադին այժմ գտնվում է Գերմանիայում, նշել է, թե դա հակասում է Արևմուտքի հակաահաբեկչական քարոզարշավին: