Բելգիական Լյեժ քաղաքի սպանդը սարսափեցնում է տուժածների քանակով

Tert.am. 14-12-2011- Վերջին տվյալներով` Լյեժ քաղաքում տեղի ունեցած դեպքերի հետևանքով վիրավորների թիվը հասել է 123-ի, ևս վեց մարդ, այդ թվում նաև ահաբեկիչը, զոհվել են: Այս մասին հաղորդում են տեղի ԶԼՄ-ները:

Բելգիայի ներքին գործերի նախարար Ժոել Միլկեն հայտարարել է` «տեղի ունեցածը ահաբեկչական ակտ չէր, այլ բռնության խելագար մի ակտ, որը մեկ հոգի է իրականացրել, հավանաբար հոգեմետ դեղերի ազդեցության ներքո»:
Հիշեցնենք, որ հանցագործը Լյեժի 32 ամյա բնակիչ Նորդին Ամրանին է, ով շուրջ 20 տարի ծանոթ է եղել ոստիկաններին և վերջին անգամ դատապարտվել էր (2007 թվականին) 5 տարվա ազատազրկման` անօրինական զենք պահելու համար:
Ոստիկանությունը ամբողջությամբ վերականգնել է ողբերգական իրադարձության սցենարը.
Տեղի ժամանակով 12:30 Սեն Լամբեր հրապարակին նայող շենքի տանիք է բարձրացել պայուսակով անձը: Նա իրար հետևից 4 նռնակ է նետել դեպի կանգառ, ապա պայուսակից հանել է FN FAL ավտոմատը և անկանոն կրակ է բացել հրապարակի մարդկանց ուղղությամբ: Երբ ավտոմատի փամփուշտները վերջացել են հանցագործը` չփորցելով փախուստի դիմել ատրճանակով ինքնասպանություն է գործել:
Հաղորդվում է նաև, որ վիրավորների մեծ մասը 19-20 տարեկան երիտասարդներ են:
Զոհերի թիվը կարող է աճել, քանի որ վիրավորներից 3-ը խիստ ծանր վիճանում են: