Իրանը Հայաստանի էներգետիկայում 571 մլն դոլար կներդնի

News.am. 9-1-2012- Իրանի մասնավոր հատվածի կոնսորցիումը 571 մլն դոլար կներդնի Հայաստանում երկրների միջեւ էլեկտրահաղորդման գծի անցկացման երկու ծրագրերում: Այս մասին տեղեկացնում է «Iran Daily»-ն: Ներդրումները Արաքս գետի հիդրոէլեկտրակայանի հզորությունը կհասցնեն տարեկան մինչեւ 1,7 գիգավատի: Համաձայնագիրը հաջորդել է Իրանի նախագահ Մահմուդ Ահմադինեջադի Հայաստան կատարած այցին, որի ընթացքում կողմերը պայմանավորվել են Արաքս գետի վրա հիդրոէլեկտրակայանի կառուցման մասին, որը երկու պետությունների միջեւ սահման կձեւավորի: Իրանի էներգետիկայի նախարար Մաջիթ Նամջուն հայտարարել է, որ Իրանը Հայաստանին գազ մատակարարելու գազատար կանցկացնի եւ, իր հերթին, հարեւան երկրից էլեկտրաէներգիա կներկրի: Ավելի վաղ Ալի Աքբար Սալեհին հայտարարել էր, որ նախագահ Մահմուդ Ահմադինեջադի Հայաստան կատարած վերջին այցի ընթացքում կողմերը համաձայնության են եկել կազմել այն ապրանքների ցուցակը, որոնք երկու երկրների միջեւ կփոխանակվեն ամենացածր սակագներով, հաղորդում է «Press TV»-ն: . Արտաքին գործերի նախարարն ավելացրել է, որ երկու երկրները բավարարված չեն ապրանքաշրջանառության ներկայիս մակարդակով, եւ ցանկալի կլիներ միջոցներ ձեռնարկել միջսահմանային գործարքները խթանելու համար: «Երկու երկրների կարծիքով` գոյություն ունեցող առեւտրային հարաբերությունները, գործարքները կարող են աճել տարեկան մինչեւ 1,5 միլիարդի», - ասել է նա: Սալեհին նաեւ նշել է, որ Հայաստանը Իրանի համար կարեւոր հարեւան է: