Ադրբեջանցիներին այս անգամ էլ ABC News–ն է կատաղեցրել

Tert.am. 9-1-2012- Ադրբեջանի ԱԳՆ–ի «սև ցուցակում» հայտնվելու վտանգի տակ է հայտնվել ամերիկյան հեղինակավոր ABC News հեռուստաալիքը։ Ինչպես հաղորդում է ադրբեջանական 1news.az կայքը, Ադրբեջանի ԱԳՆ–ն այժմ ԱՄՆ–ում գտնվող իր դիվանագիտական ներկայացուցչության միջոցով փորձում է պարզել, թե արդյոք ճիշտ է այն տեղեկությունը, որ հեռուստաալիքը Լեռնային Ղարաբաղը ներառել է 2012թ. այցելության համար 7 ինքնատիպ վայրերի շարքում։ Հեռուստաալիքը երեկ հրապարակել էր 2012թ. այցելության համար 7 ինքնատիպ վայրերի ցանկը։ ԼՂ–ին վերաբերող հատվածում, մասնավորապես, նշվում է. «Բոլոր նրանց համար, ովքեր արկածներ են փնտրում, Հայաստանի և Ադրբեջանի միջև գտնվող Լեռնային Ղարաբաղը հենց այդ վայրն է»։ «Արշավանքների գնացեք ձնածածկ լեռների ու կարմիր և դեղին ծաղիկներով ծածկված դաշտերի միջով։ Ճաշին վայելեք խորոված միսն ու բանջարեղենը։ Եվ եթե դուք հյուրընկալվեք տեղի բնակիչների տանը, մի զարմացեք, եթե նախաճաշին ձեզ թթի օղի առաջարկեն»,–ասված է հոդվածում։ ABC News–ն այնուհետ զբոսաշրջիկներին խորհուրդ է տալիս Գանձասարի վանք այցելել, որը թարգմանաբար նշանակում է «գանձերի սար»։ «Այցելեք այն գիշերը, որպեսզի տեսնենք խավարի մեջ լուսավորված վանքը»,–ասված է հոդվածում։ Յոթ ինքնատիպ վայրերի ցանկում հեռուստաընկերությունը ընդգրկել է նաև՝ Չիլիում գտնվող Ատակամա անապատը, Պորտուգալիայի մայրաքաղաք Լիսաբոնը, Նիդեռլանդներում գտնվող Վենլո քաղաքը, Լաոսի հյուսիսում գտնվող Լուանգ Պրաբանգ քաղաքը, Թայլանդի Ռեյլեյ լողափը, Ավստրալիայի Ուիթսանդի կղզիները։ Նշենք, որ ավելի վաղ «սև ցուցակում» հայտնվելու վտանգի տակ էին հայտնվել Betravel (Բելգիա), Gigatour (Գերմանիա) և Oceanides (Ֆրանսիա) տուրիստական ընկերությունները, որոնք Լեռնային Ղարաբաղը ներկայացրել էին որպես անկախ պետություն ու այն ներառել էին իրենց 2012թ. տուր–փաթեթների մեջ։