Ֆրանսիայի ԱԳ նախարարը ընդունում է կառավարության դիրքորոշումը ցեղասպանությունների մասին օրինագծի վերաբերյալ

News.am.. 9-1-2012- Ֆրանսիայի արտգործնախարար Ալեն Ժյուպեն հարցազրույց է տվել պորտուգալական հեռուստատեսությանը, որը եթեր է հեռարձակվել հունվարի 7-ին: Ինչպես հայտնում է ֆրանսիական Le Point հանդեսը, վկայակոչելով France-Presse-ը, հիշատակելով Անկարայի եւ Փարիզի հարաբերություններում առկա լարվածությունը Ֆրանսիայի խորհրդարանում Հայոց ցեղասպանության ժխտումը քրեականացնող օրինագծի ընդունումից հետո, Ժյուպեն կրկին կոչ է արել Թուրքիային «սուր չարձագանքել», քանի որ «անխուսափելի է հարաբերությունների վերականգնումը, որոնք համագործակցության եւ գործընկերության հարաբերություններ էին»: «Ես հստակ արտահայտել եմ իմ տեսակետը»,- ասել է նա` ակնարկելով իր վերապահումները տվյալ օրինագծի վերաբերյալ. «բայց ես կառավարության մաս են, որը դիրքորոշում ունի, եւ ես իմ վրա եմ վերցնում այդ դիրքորոշումը»: Նշենք, որ Ֆրանսիայի Ազգային Ժողովը դեկտեմբերի 22-ին ընդունել է Հայոց ցեղասպանության ժխտումը քրեականացնող օրինագիծը, որով 1 տարվա ազատազրկում եւ 45 հազար եվրո տուգանք է սահմանվում: