Թուրքիայի նախկին նախագահի դեմ կազմված մեղադրական զեկույցն ընդունվել է դատարանի կողմից

News.am. 10-1-2012- Անկարայի ծանր հանցագործությունների գծով 12-րդ դատարանն ընդունել է 1980-ի հեղաշրջման հեղինակ Քենան Էվրենի դեմ դատախազության կողմից պատրաստված մեղադրական զեկույցը։ Թուրքական Milliyet-ի փոխանցմամբ՝ Անկարայի հատուկ իրավասություններով գլխավոր դատախազի տեղակալ Հուսեյն Գյորուշենը հայտնել է, թե դատարանն ուսումնասիրել է Թուրքիայի 7-րդ նախագահ Քենան Էվրենի դեմ պատրաստված մեղադրական զեկույցը եւ ընդունել վարույթ։ Մեղադրական զեկույցում այն ժամանակվա ԶՈՒ գլխավոր շտաբի պետ Քենան Էվրենի համար պահանջվում է ցմահ ազատազրում՝ ռազմական հեղաշրջման համար։ Նշենք, որ Թուրքիայում 1980-ի սեպտեմբերի 12-ին իրականացված զինվորական հեղաշրջման գլխավոր դերակատարը հանդիսացել է այն ժամանակվա ԶՈՒ գլխավոր շտաբի պետ Քենան Էվրենը, ով հեղաշրջումից հետո դարձել էր Թուրքիայի նախագահ։ Քենան Էվրենը ներկայումս 94 տարեկան է։ Նա ավելի վաղ հայտարարել էր, թե ավելի լավ է ինքնասպան լինի, քան դատվի հեղաշրջման համար։