Անկարայում Փարիզի պողոտան կարող է վերանվանվել Ալժիրի պողոտա

1in.am. 10-1-2012- Թուրքական Anadolu գործակալության փոխանցմամբ, Անկարայի քաղաքապետարանում տեղի է ունեցել ժողով՝ նվիրված Ֆրանսիայում Հայոց ցեղասպանության հերքումը քրեականացնող օրինագծի ընդունման կապակցությամբ իրենց՝ այսպես կոչված՝ հակաքայլերին։ Այդ պլանում առաջարկվել է վերանվանել Անկարայում գտնվող Փարիզի պողոտան, որի վրա գտնվում է Թուրքիայում Ֆրանսիայի դեսպանատունը։ Ուշագրավ է, որ այն առաջարկում են վերանվանել Ալժիրի պողոտա։ Բացի այդ, առաջարկվում է Շարլ դը Գոլի անվան պողոտան վերանվանել Ալժիրի հերոսներից մեկի անունով։ Հիշեցնենք, որ նախորդ տարվա դեկտեմբերի 22-ին Ֆրանսիայի Ազգային ժողովում Հայոց ցեղասպանության հերքումը քրեականացնող օրինագծի ընդունումից անմիջապես հետո Անկարայի քաղաքապետ Մելիհ Գյոքչեքը հայտարարել էր, որ, ի պատասխան, Անկարայում Ֆրանսիայի դեսպանատան շենքի առջև տեղադրվելու է «ալժիրցիների ցեղասպանության» հուշարձանը։ Նա հավելել էր, որ այդ հուշարձանն այնպես է տեղադրվելու, որ դեսպանատուն մուտք գործողներն ու այնտեղից դուրս եկողներն անպայմանորեն նկատեն դա։