Թուրքիան Շվեյցարիայից պարզաբանումներ է պահանջում թուրք նախարարի դեմ հետաքննությունն սկսելու համար

Tert.am. 6-2-2012- Շվեյցարիայի դեսպանը կանչվել է Անկարայում Թուրքիայի Արտաքին գործերի նախարարություն, որտեղ նրանից պարզաբանումներ են պահանջել, կապված Շվեյցարիայի դատախազություն կողմից Թուրքիայի՝ Եվրամիության հարցերով նախարար Էգեմեն Բաղըշի նկատմամբ, Հայոց ցեղասպանությունը ժխտելու համար հետաքննություն անցկացնելու հետ: ԱՊԱ գործակալության հաղորդմամբ, դեսպան Ռայմոնդ Կունցին Թուրքիայի արտգործնախարարություն է հրավիրել նախարարության ապարատի ղեկավար Ֆ. Սինիրլիողլուն, ով հայտարարել է, որ Թուրքիայի կառավարությունը նման քայլը անթույլատրելի է համարում: Հիշեցնենք, որ Էգեմեն Բաղըշը Ցյուրիխում հունվարի 30-ին ասել էր, թե ինքը Ցեղասպանությունների ժխտումը քրեական հանցանք համարող երկրում էլ կարող է ասել, որ Հայոց ցեղասպանություն չի եղել։ «Ես այսօր Շվեյցարիայում հայտարարում եմ, որ 1915-ի իրադարձությունները ցեղասպանություն չեն: Թող գան ու ինձ ձերբակալեն։ Այդ օրենքները թղթի մի կտորից այն կողմ չեն անցնում», - ասել էր Բաղըշը։ Այսօր հայտնի դարձավ, որ Շվեյցարիայի Ցյուրիխ կանտոնի դատախազությունը Բաղըշի դեմ հետաքննություն է սկսել, որն ընթանում է Շվեյցարիայի քրեական օրենսգրքի 261-րդ կետի հիման վրա։