Ահմադինեժադ. Իրանը եթե 3 տարի էլ նավթ չվաճառի, երկիրը հանգիստ կարող է գոյատևել

Panorama.am. 10-4-2012- Իրանը եթե 3 տարի էլ նավթ չվաճառի, երկիրը հանգիստ կարող է գոյատևել: Այդ մասին իրանական «ՖԱՐՍ» լրատվական գործակալության հաղորդմամբ` հայտարարել է Իրանի նախագահ Մահմուդ Ահմադինեժադը: «Որոշ երկրներ իրանական նավթի նկատմամբ պատժամիջոցներ սահմանելով` փորձում են Իրանի նկատմամբ խնդիրներ առաջացնել, սակայն պետք է նշեմ, որ Իրանն այնքան պաշարներ ունի, որ երեք տարի էլ նավթ չվաճառենք, երկիրը հանգիստ կկառավարվի»,-հայտարարել է Իրանի նախագահը: Իրանական «խաբարօնլայն.իռ» կայքի հաղորդմամբ էլ` Իրանի նավթի նախարար Ռոսթամ Ղասեմին, անդրադառնալով եվրոպական որոշ երկրներին իրանական նավթի առաքման կասեցման հարցին, նշել է, որ Իրանն արդեն դադարեցրել է նավթի արտահանումը Հունաստան: Հիշեցնենք, որ ս.թ. հունվարի 23-ին ԵՄ անդամ երկրները որոշում կայացրեցին իրանական նավթի նկատմամբ էմբարգո կիրառել հուլիսի սկզբից: Որոշման համաձայն` ԵՄ անդամ երկրները մինչև 2012թ. հուլիս ամիսը պետք է դադարեցնեն Իրանի հետ նավթի ներմուծման մասին կնքված պայմանագրերը: Ի պատասխան ԵՄ նախաձեռնությանը` Իրանի կառավարությունը որոշում կայացրեց Եվրոպային նավթ մատակարարել մինչև վերջինիս կողմից պատժամիջոցների կիրառման ժամկետը: Հավելենք, որ իրանական նավթը տոկոսային հարաբերակցությամբ ներկրում են հետևյալ երկրները` Ճապոնիա (14%), Հարավային Կորեա (10%), Չինաստան (22%), ասիական այլ երկրներ (12%), Հնդկաստան (13%), Հարավային Աֆրիկա (4%), Իսպանիա (6%), Իտալիա (7%), Թուրքիա (7%), ԵՄ անդամ այլ երկրներ (5%):