Քրիստոսի Այլակերպութեան-Պայծառակերպութեան տօնը մեր եկեղեցու հինգ մեծ տաղաւարներից (մեծ
տօն) մին է: Մեր ժողովուրդը այս տօնը տօնում է յատուկ երկիւղածութեամբ եւ բարեպաշտութեամբ իսկ կրօնական արարողութիւններից յետոյ կամ յետ միջօրէին էլ կատարում է հեթանոսական օրերից մեզ հասած միմեանց վրայ ջուր թափելու աւանդութիւնը, որը քրիստոնէական նշանակութիւն է ստացել. ջուրը մաքրող, սրբող յատկութիւն ունի, քրիստոնէական իմաստով ան հաւատացեալը սրբում, մաքրում է իր մեղքերից: Ժամանակին նոյն այս տօնի այլ սովորութիւններից է եղել խաղերի կազմակերպում, աղաւնիներ թռցնելը: Աղաւնին միշտ խորհրդանիշ է եղել խաղաղութեան: Ազգագրական այս գեղեցիկ սովորութիւնները իրենց նոր քրիստոնէաբոյր յատկանիշով պահելն ու պահպանելը մեր բոլորի պարտականութիւնն է. հետեւաբար մեր հայրական թելադրանքն ու պատւէրը մեր երիտասարդութեան այն է, որ գան մասնակցեն կիրակի օրւայ կրօնական արարողութեան, Ս. Հաղորդութիւն ստանան եւ ապա եկեղեցական արարողութեան եւ Ս. պատարագի աւարտին եկեղեցու շրջափակում կատարեն նաեւ վարդավառի, կամ վարդեւորի աւանդական ջրթափը պատշաճութեան սահմանում եւ հայավայել եւ քրիստոնէավայել ձեւով: Թելադրելի է որ մեր միութիւններն էլ յետ միջօրէի կազմակերպեն նման ջրթափի աւանդական սովորութիւն ի վայելումն մեր երիտասարդութեան եւ ինչու չէ նաեւ ողջ ժողովրդին: Շնորհաւորում ենք մեր ողջ ժողովրդի բոլոր զաւակներին Քրիստոսի Պայծառակերպութեան տօնի առիթով եւ բոլորին ցանկանում ամենայն բարիք եւ աստւածային օրհնութիւն: Մասնակցենք Կրօնական եւ աշխարհիկ արարողութիւններին զգաստութեամբ, պատշաճութեամբ եւ քրիստոնէավայել կերպով: Կիրակի, 01 Յուլիս 2012 ՍԵՊՈՒՀ ԱՐՔ. ՍԱՐԳՍԵԱՆ ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ
Tehran Time
Yerevan Time
No comments:
Post a Comment