Monday, September 24, 2012

Սերժ Սարգսյան. Ֆրանսիայի հետ Հայաստանն ունի ջերմ, բարեկամական և առանձնաշնորհյալ հարաբերություններ

Panorama.am. 23-9-2012- Ֆրանսիայի հետ Հայաստանն ունի ջերմ, բարեկամական և առանձնաշնորհյալ հարաբերություններ: Այսպես է հայտարարել Հայաստանի նախագահ Սերժ Սարգսյանը՝ սեպտեմբերի 22-ին հեռահաղորդակցության ոլորտում հայտնի ֆրանսահայ գործարար Սերժ Չուրուկին և նրա հետ Հայաստան ժամանած ֆրանսիացի խոշոր գործարարներից բաղկացած պատվիրակության հետ հանդիպման ընթացքում, տեղեկացնում են նախագահի լրատվական ծառայությունից: Հայ-ֆրանսիական դարավոր բարեկամությունը, Սերժ Սարգսյանի խոսքով, պայմանավորված է թե՛ պատմական սերտ առնչություններով, թե՛ երկու երկրների և ժողովուրդների մտերմության համար յուրօրինակ կամուրջ հանդիսացող ֆրանսահայ համայնքով: Հայաստանում և ամբողջ աշխարհում հայերը, ըստ Նախագահի, սիրում են Ֆրանսիան, Ֆրանսիայի հարուստ մշակույթն ու արժեհամակարգը: Նախագահը նշել է, որ Հայաստանի և Ֆրանսիայի միջև դիվանագիտական հարաբերությունների հաստատումից ի վեր` անցած 20 տարիներին երկկողմ հարաբերություններում մեծ առաջընթաց է արձանագրվել, և Հայաստանը շահագրգռված է է՛լ ավելի խորացնելու, ընդլայնելու Ֆրանսիայի հետ համագործակցությունը հնարավոր բոլոր ոլորտներում: Սերժ Չուրուկը շնորհակալություն է հայտնել Նախագահ Սերժ Սարգսյանին ջերմ հյուրընկալության համար և ընդգծել, որ ինքն ու ճանաչողական այցով Հայաստան ժամանած և արդեն հայ ժողովրդի պատմությանն ու մշակույթին քաջատեղյակ իր ընկերները հենց այդ նպատակով են այցելել Հայաստան: Ֆրանսահայ հեղինակավոր գործարարի հավաստմամբ, իրենք ցանկանում են այցի շրջանակներում տեղում ծանոթանալ Հայաստանի տնտեսությանը, ներդրումային միջավայրին և առկա ծրագրերին, հանդիպումների ժամանակ քննարկել Հայաստանի տնտեսության մեջ ֆրանսիական նոր ձեռնարկությունների ու ներդրումների ներգրավման հնարավորությունները՝ այդպիսով նպաստելով երկկողմ առևտրատնտեսական կապերի առավել ընդլայնմանն ու խորացմանը: Նախագահը ֆրանսիացի գործարարներին ներկայացրել է մեր երկրի տնտեսության առաջնահերթությունները, ընթացիկ և հեռանկարային ծրագրերը, իրականացվող բարեփոխումները, Հայաստան-Եվրամիություն հաջողությամբ զարգացող համագործակցությունը: Ըստ աղբյուրի, պատվիրակության կազմում ընդգրկված են ամենատարբեր՝ հեռահաղորդակցության, տեղեկատվական տեխնոլոգիաների, շինարարական աշխատանքների և արտադրանքի, արդյունաբերության, առևտրային խոշոր կենտրոնների կառուցման ու շահագործման և մի շարք այլ ոլորտներ ներկայացնող հեղինակավոր գործարարներ, ովքեր Ֆրանսիայի տնտեսական և քաղաքական կյանքում կարևոր տեղ են զբաղեցնում:

No comments: