Ղարաբաղյան հարցն արտացոլված չէ «ճանապարհային քարտեզում», հաղորդում են թուրքական ԶԼՄ-ները

Tert.am.24-4-2009-Թուրքական լրատվամիջոցներին հայտնի են դարձել Հայաստանի և Թուրքիայի միջև սահմանված «ճանապարհային քարտեզի» մանրամասները։ Ինչպես հաղորդում է Sabah թերթը, Շվեյցարիայում ընդունված որոշումները կարող են հրապարակվել մայիսին։ «Գործընթացն արդեն սկսված է։ Երկու երկրների հարաբերությունները բարելավելու նպատակով ստեղծվելու են հանձնաժողովներ՝ բարձր և ցածր մակարդակով», - հրատարակությանը հաղորդել է Թուրքիայի ԱԳՆ բարձրաստիճան պաշտոնյան, ով, սակայն, նախընտրել է անհայտ մնալ։ Հիշեցնենք, որ ՀՀ և Թուրքիայի արտաքին գործերի նախարարությունները և Շվեյցարիայի արտաքին գործերի դաշնային դեպարտամենտը չորեքշաբթի հանդես էին եկել համատեղ հայտարարությամբ։ Համաձայն Sabah-ի տեղեկատվության՝ Շվեյցարիայում ձեռք է բերվել պայմանավորվածություն 5 կետերի շուրջ։ Մասնավորապես, որոշում է կայացվել այն մասին, որ Հայաստանը կընդունի 1921թ. Թուրքիայի և Խորհրդային Ռուսաստանի միջև Կարսի պայմանագիրը և որ այն չի դառնալու քննարկման առարկա։ Հայոց ցեղասպանության փաստն ուսումնասիրելու նպատակով ստեղծվելու է պատմաբանների հանձնաժողով՝ այդ թվում՝ երրորդ երկրի պատմաբանների մասնակցությամբ։ Ըստ Sabah-ի՝ ենթադրվում է երկու երկրների միջև սահմանի բացում և առևտուր իրականացնելուն ուղղված աշխատանքների նախապատրաստում։ Բացի այդ, դիվանագիտական հարաբերությունների հաստատման շրջանակներում երկու երկրները նախնական փուլում փոխադարձ հիմքերի վրա հավատարմագրելու են իրենց դեսպաններին Թբիլիսիում, իսկ այնուհետև դեսպանատներ են բացելու Երևանում և Անկարայում։ Ինչպես հաղորդում է Sabah-ը, Լեռնային Ղարաբաղի հարցը պայմանավորվածությունում արտացոլված չէ։ Միևնույն ժամանակ, հաղորդվում է , որ «ճանապարհային քարտեզը» դե-ֆակտո կապված է այդ հարցի հետ։ Թուրքական լրատվամիջոցների հաղորդմամբ՝ օրերս սպասվում է Թուրքիայի վարչապետ Ռեջեփ Թայիփ Էրդողանի այցը Բաքու՝ պաշտոնական Անկարայի դիրքորոշումը Ադրբեջանին ներկայացնելու նպատալով։