ՄԻ պաշտպանը դիմել է Սեյրան Օհանյանին

Tert.am. 5-5-2009- Մարդու իրավունքների պաշտպան Արմեն Հարությունյանը նամակով դիմել է Սեյրան Օհանյանին՝ անդրադառնալով Երևանի ավագանու անդամների ընտրությունների ընթացքին։ Նամակում նշված է. «Առավոտ» օրաթերթի 24.04.2009թ. համարում հրապարակվել է «Պաշտպանության նախարարի շրջաբերականը» վերտառությամբ հոդված, ըստ որի ՀՀ պաշտպանության նախարարության տեղեկատվության և հասարակայնության հետ կապերի վարչության պետ, գեներալ-մայոր Վ. Ավետիսյանը 06.04.2009թ. թիվ 145 գրությամբ էլեկտրոնային փոստով հանձնարարական է փոխանցել զորամասերի հրամանատարներին, որի համաձայն Երևան քաղաքի ավագանու ընտրություններին զինծառայողների մասնակցությունն ապահովելու նպատակով ՀՀ պաշտպանության նախարարի շտապ կատարման ենթակա հանձնարարականով անհրաժեշտ է մինչև 09.04.2009թ. ՀՀ պաշտպանության նախարարության տեղեկատվության և հասարակայնության հետ կապերի վարչություն ներկայացնել զորամասերում ծառայող, Երևան քաղաքի գրանցում ունեցող, սակայն Երևանում չբնակվող սպաների, ենթասպաների, պայմանագրային զինծառայողների, բանվոր-ծառայողների, նրանց ընտանիքների՝ քվեարկելու իրավունք ունեցող անդամների, համակիրների անվանացուցակը։ Միաժամանակ նշվել է, որ անհրաժեշտ է ցուցակներում ընդգրկվածների ծառայությունը կազմակերպել այնպես, որպեսզի նրանք ընտրություններից առնվազն 3 օր առաջ մեկնեն Երևան՝ ընտրությունների հետ կապված առանձին խնդիրներ լուծելու համար։ ՀՀ Սահմանադրության 8.2-րդ հոդվածի համաձայն. «Զինված ուժերը քաղաքական հարցերում պահպանում են չեզոքություն և գտնվում են քաղաքացիական վերահuկողության ներքո», իսկ ՀՀ ընտրական օրենսգրքի 2-րդ հոդվածի 6-րդ կետի համաձայն. «Զինծառայության մեջ գտնվող կամ վարժական հավաքներ անցնող զինծառայողներ համարվող քաղաքացիները չեն կարող մաuնակցել տեղական ինքնակառավարման մարմինների և Ազգային ժողովի` մեծամաuնական ընտրակարգով ընտրություններին»։ Ղեկավարվելով «Մարդու իրավունքների պաշտպանի մասին» ՀՀ օրենքի 12-րդ հոդվածով՝ խնդրում եմ հայտնել եղել է արդյոք նման հրաման /հանձնարարական/, եթե այո, ապա ուղարկել դրա պատճենը և ներկայացնել Ձեր պարզաբանումները վերոգրյալի կապակցությամբ»։