Thursday, March 25, 2010

ԱՆԿԱՐԱՆ ՎԱՇԻՆԳՏՈՆԻՆ ՎԵՐՋՆԱԳԻ՞Ր Է ՆԵՐԿԱՅԱՑՆՈՒՄ

«ԱԶԳ», 25-03-2010- Երեկ Թուրքիայի արտաքին գործերի նախարար Ահմեդ Դավութօղլուն ներկայացրել է այն պայմանները, որոնց պարագայում դեսպան Նամըք Թանը կվերադառնա Վաշինգտոն: «Թուրքիան իր դեսպանին հետ չի ուղարկի Վաշինգտոն, մինչեւ Օբամայի վարչակազմը եւ Կոնգրեսը հստակ չասեն, որ չեն դատի Թուրքիայի պատմությունը», Դավութօլղլուի խոսքերն է մեջբերել Washington Post պարբերականը: Թերթի փոխանցմամբ` Անկարան դեսպանին հետ կուղարկի ԱՄՆ երկու պայմանով` վարչակազմը եւ Կոնգրեսը պետք է ձեռնպահ մնան Թուրքիայի պատմության մասին որոշումներ ընդունելուց, եւ պետք է համաձայնություն լինի` զարգացնելու ռազմավարական դաշնակիցների համագործակցությունը: Հիշեցնենք, որ Անկարան Միացյալ Նահանգներից հետ կանչեց դեսպան Նամըք Թանին, երբ Ներկայացուցիչների պալատի արտաքին հարաբերությունների հանձնաժողովն ընդունեց Հայոց ցեղասպանությունը ճանաչող բանաձեւը: Ի դեպ, անցյալ շաբաթ ԱՄՆ պետդեպարտամենտը հայտարարել էր, որ վարչակազմի եւ Կոնգրեսի միջեւ պայմանավորվածություն չկա` կանխելու Հայոց ցեղասպանությունը ճանաչող բանաձեւի ընդունումը Ներկայացուցիչների պալատի լիագումար նիստում: Ի հավելումն դրա, «Մեջլիս» պարբերականը գրում է, որ մինչ դեսպանի հարցով որեւէ որոշում կայացնելը Թուրքիայի կառավարությունը կսպասի ԱՄՆ նախագահ Բարաք Օբամայի ապրիլի 24-ի ուղերձին:

No comments: