Թուրքերը միայն տեղադրում են տերմինալի ճակատամասի ապակիները. «Զվարթնոցը» հերքում է թուրքական մամուլին

Tert.am. 2-11-2010- «Զվարթնոց» օդանավակայանի նոր տերմինալի շինաշխատանքներն իրականացվում է շուրջ 30 տեղական և արտասահմանյան շինարարական ընկերությունների մասնակցությամբ։ Այդ թվում՝ շինաշխատանքներին մասնակցում է նաև թուրքական ենթակապալառու մեկ կազմակերպություն, որն ընդամենը իրականացնում է տերմինալի ճակատամասի ապակիների տեղադրման աշխատանքները։ Այս մասին Tert.am-ին տեղեկացրեց «Զվարթնոց» օդանավակայանի մամուլի քարտուղար Գևորգ Աբրահամյանը՝ հերքելով թուրքական մամուլի այն հրապարակումները, թե օդանավակայանի նոր տերմինալի շինարարությունն իրականացվում է թուրքական շինանյութով և թուրք մասնագետների կողմից։ «Այդ տեղեկատվությունը չի համապատասխանում իրականությանը»,- ասաց Աբրահամյանը։
Թուրքական Gebzegazetesi կայքի հոդվածագիր Իսմայիլ Քահրամանը, ով երեք օր շարունակ շրջել է Հայաստանում և ինչ-որ փաստագրական ֆիլմ նկարահանել մեր երկրի մասին, գրել է, թե «Զվարթնոց» օդանավակայանի նոր տերմինալի շինարարությունն իրականացվում է թուրքական շինանյութով, թուրք մասնագետների կողմից:
«Աշխարհի շատ երկրներում եմ ականատես եղել թուրք գործարարների հաջողությանը և միշտ հպարտացել եմ դրանով: Սակայն մեկ այլ հպարտություն է՝ տեսնել թուրք գործարարների հաջողությունը Հայաստանում: Թուրքական ապրանքները վաճառվում են գրեթե ամենուրեք: Արգենտինահայ մի գործարար, ով Հայաստանին օգնելու համար որոշել է կառուցել Երևանի օդանավակայանը, ինչպես մասնագետների, այնպես էլ շինանյութի տեսանկյունից նախապատվությունը տվել է Թուրքիային: Օդանավակայանի շինարարության գործում ընդգրկված տեխնիկական հարցերի մասնագետները Թուրքիայից են ժամանում, Թուրքիայից է բերվում նաև անհրաժեշտ շինանյութը»,- գրում է թուրք հոդվածագիրը` ընդգծելով, որ հակառակ բոլոր դժվարություններին` թուրք գործարարները կարողանում են լուրջ գումարներ աշխատել Հայաստանում։
Իսմայիլ Քահրամանն իր հրապարակման մեջ անդրադառնում է նաև Հայոց ցեղասպանությանը՝ նշելով, որ հայերին չի հաջողվելու այդ հարցում ճնշումներ գործադրել Թուրքիայի վրա:
«Հայաստանին երբեք չի հաջողվելու Ցեղասպանության ստով ծանր վիճակի մեջ դնել Թուրքիային: Ըստ էության, Հայաստանի քաղաքացին անգամ տեղյակ էլ չէ հայկական լոբբիստական կազմակերպությունների` Ցեղասպանության թեմայի առնչությամբ քարոզչության մասին: Երանի հայկական լոբբիներն ու Սփյուռքը Հայոց ցեղասպանության ստի ճանաչման համար ծախսած գումարներն ուղղեին Հայաստանի զարգացմանը: Իսկ փակ սահմաններից ամենից շատը տուժում է Հայաստանը… Եթե այսպես շարունակվի, Թուրքիայից հող պահանջող Հայաստանում երիտասարդ բնակչություն չի մնա, և Հայաստանն ի զորու չի լինի տեր կանգնել անգամ իր այսօրվա տարածքներին»,- եզրափակում է թուրք հոդվածագիրը: