Հունգարիան ժեստ արեց Անկարային՝ խորհրդարանում բարձրացնելով ԼՂ հարցը. թուրքական ԶԼՄ–ներ

Tert.am. 15-4-2011- Թուրքիայի՝ ԵՄ լիիրավ անդամակցությանը աջակցող Հունգարիան ժեստ արեց Թուրքիային՝ խորհրդարանում բարձրացնելով արտաքին քաղաքականության բնագավառում Անկարայի գլուխը ցավեցնող Լեռնային Ղարաբաղի հարցը։ Այս մասին է գրում թուրքական «Ջիհան» գործակալությունը՝ մեկնաբանելով «Շարժում հանուն ավելի լավ Հունգարիայի» (Jobbik) գլխավոր ընդդիմադիր կուսակցության կողմից Հունգարիայի խորհրդարանում ղարաբաղյան հիմնախնդրի վերաբերյալ ներկայացված բանաձևը։
Jobbik կուսակցությունից պատգամավոր և թուրք–հունգարական բարեկամության խմբի նախագահ Տամաս Հեգեդուսը Բուդապեշտում թուրք լրագրողների հետ հանդիպման ժամանակ տեղեկացրել է, որ ղարաբաղյան հիմնախնդրի վերաբերյալ բանաձևն առաջիկայում կքննարկվի Հունգարիայի խորհրդարանի Արտաքին հարաբերությունների հանձնաժողովում, որից հետո քվեարկության կդրվի լիագումար նիստում։
«Եվրամիությունում նախագահող Հունգարիայի խորհրդարանի օրակարգում նման բանաձևի ընդգրկումը անհանգստացրել է Հայաստանին, ով մինչև հիմա աշխարհի տարբեր երկրների խորհրդարաններում Թուրքիայի դեմ որոշումներ էր ընդունել տալիս»,– նշում է «Ջիհանը»։
Տամաս Հեգեդուսի խոսքով՝ իր կուսակցությունը պատրաստվում է առաջիկայում թուրքամետ մի բանաձև էլ ներկայացնել կիպրական հիմնախնդրի առնչությամբ։
Հունգարիայի ընդդիմադիր կուսակցության կողմից ներկայացված բանաձևում, ըստ թուրքական լրատվամիջոցների, նշվում է, որ «հայկական կողմը պետք է դուրս գա օկուպացված ադրբեջանական տարածքներից, և պետք է իրենց տները վերադառնան պատերազմի պատճառով հեռացած 1 միլիոն ադրբեջանցիները»։