Իրանական կայք. «Ադրբեջանում շահագրգռված են, որպեսզի Իրանից թմրանյութեր ներկրվեն այդ երկիր»

Panorama.am 8-7-2011- «Ադրբեջանական լրատվամիջոցներն Իրանից ապօրինի թմրամիջոցների ներկրման վերաբերյալ տեղեկատվություն հրապարակելիս երկակի քաղաքականություն են վարում»:

Այդ մասին նշված է իրանական «արաննյուզ.իռ» կայքում թողարկված հոդվածում:
«Վերջերս, երբ Իրանի Արդեբիլ նահանգի արդարադատության համակարգի ղեկավարի կողմից ապօրինի թմրամիջոցներով զբաղվող անձանց նկատմամբ մահապատժի դատավճիռ կիրառվեց, ադրբեջանական ԶԼՄ-ները գրեցին, թե Իրանում խախտվում են մարդու իրավունքները, իսկ երբ, Իրանից ապօրինի թմրամիջոցներ է ներկրվում Ադրբեջան, այդ պարագայում նույն ադրբեջանական ԶԼՄ-ները մեղադրում են Իրանին համապատասխան քայլեր չձեռնարկելու և ապօրինի թմրամիջոցներ առաքողներին աջակցելու մեջ»,-նշված է հոդվածում:
Կայքի հոդվածագիրը շարունակում է. «Փորձագետների դիտարկմամբ` Ադրբեջանի ԶԼՄ-ների նման կեցվածքը մի բան է վկայում, որ Ադրբեջանում շահագրգռված են, որպեսզի Իրանից թմրանյութեր ներկրվեն այդ երկիր. այդ դեպքում մի կողմից ադրբեջանական ԶԼՄ-ները հակաիրանական բովանդակությամբ հոդվածներ են թողարկում, իսկ մյուս կողմից, ապօրինի թմրանյութերով զբաղվող ադրբեջանական խմբավորումները, որոնք գտնվում են իշխանական տարբեր օղակներում, նրանից մեծ շահույթ են ստանում»