Ռուսաստանի գլխավոր զինվորական դատախազ Սերգեյ Ֆրիդինսկին այսօր ասել է, որ չնայած բանակում պայմանների բարելավմանն ուղղված լրացուցիչ միջոցներին եւ իրականացվող բարեփոխումներին, անցյալ տարի զինված ուժերում մեծ թվով զինծառայողներ ինքնասպանություն են գործել:«341 մարդ` դա գրեթե մեկ գումարտակ է, այդքան անդառնալի կորուստ ենք ունեցել անձնասպանությունների հետեւանքով», - նշել է գլխավոր զինդատախազը:
«Ռոյթերզ» լրատվական գործակալության փոխանցմամբ` իրավապաշտպանները ինքնասպանությունների մեծ թիվը բացատրում են ռուսական բանակին բնորոշ բռնի ավանդույթներով եւ դրանց նկատմամբ սպաների ու բարձրաստիճան գեներալների անտարբերությամբ:
Ռուսական բանակում շատ հաճախ հալածվում, նվաստացվում, ծեծի եւ այլ բռնությունների են ենթարկվում հատկապես նորակոչիկները: Ամեն տարի տասնյակ հազարավոր զորակոչիկներ եւ նրանց ծնողները դիմում են ամեն միջոցի՝ երիտասարդներին բանակից ազատելու համար: Ռուսաստանի պաշտպանության նախարարության տվյալներով` հոգեբանական դժվարությունների պատճառաբանությամբ բանակից ամեն տարի ազատվում է շուրջ 100 հազար երիտասարդ:
Գլխավոր զինդատախազ Ֆրիդինսկու փոխանցմամբ` 2006 թվականի համեմատությամբ 2007-ին բանակում զոհվածների ընդհանուր թիվը նվազել է, սակայն աճել է ոչ մարտական պայմաններում զոհվածների թիվը: Ընդ որում, դա չի կարելի բացատրել բացառապես ոչ կանոնակարգային հարաբերություններով, քանի որ ինքնասպանություն գործածների կեսը պայմանագրային զինծառայողներ են, ովքեր սովորաբար չեն ենթարկվում հալածանքների:
«Ռոյթերզ»-ը նշում է, որ ռուսական զինված ուժերը ԽՍՀՄ-ի փլուզումից հետո անհրաժեշտ ֆինանսավորում չեն ստացել, զինծառայողների սոցիալական պայմանները վատթարացել են, բանակում բարոյահոգեբանական անկումային երեւույթներ են սկսվել, սակայն Վլադիմիր Պուտինի նախագահության օրոք ֆինանսավորումը եւ ուշադրությունը բանակի հանդեպ էապես աճել են:
Բարձրաստիճան գեներալները բազմիցս հավաստիացրել են, որ ամեն ինչ արվում է ոչ մարտական կորուստների թիվը նվազեցնելու եւ բանակում «դեդովշչինան»՝ ոչ կանոնակարգային հարաբերություններն արմատախիլ անելու համար:
Ռուսաստանի զինված ուժերում ներկայումս ծառայում է ավելի քան մեկ միլիոն մարդ:
Tehran Time
Yerevan Time
No comments:
Post a Comment