Beeline-ը մտադիր չէ դադարեցնել ռոումինգ ծառայությունները Լեռնային Ղարաբաղում

/PanARMENIAN.Net/ 28.08.2009 - Նախորդ օրվա հաղորդագրություններից մեկում ադրբեջանական Day.az ինտերնետ-թերթը հերթական անգամ վրդովմունք է հայտնել, այս անգամ այն առիթով, որ «ԱրմենԹել» ՓԲԸ (Հայաստանի տարածքում ապրանքանիշը` Beeline) հայկական բջջային օպերատորը, որը մտնում է «ՎիմպելԿոմ» ընկերությունների խմբի մեջ, ռոումինգ ծառայություններ է տրամադրում Լեռնային Ղարաբաղի տարածքում: Այդ առիթով Day.az-ը հերթական բողոքի ակցիան է անցկացրել` նախատեսլեով ճնշում գործադրել Beeline ընկերության ղեկավարության վրա: PanARMENIAN.Net գործակալությունը դիմեց «ԱրմենԹել» ՓԲԸ-ին (ապրանքանիշը` Beeline)` ադրբեջանական բողոքին հնարավոր արձագանքը մեկնաբանելու խնդրանքով եւ ստացավ հետեւյալ միանշանակ պատասխանը. «Չնայած, որ Ղարաբաղ-Թելեքոմը համաձայնագրեր ունի 120 օպերատորների հետ աշխարհի 80 երկրներում, հասկանալի է, որ ցավոտ արձագանք է առաջացնում հենց Beeline-ը` համաշխարհային հայտնի ապրանքանիշն ու խոշորագույն միջազգային օպերատորը: Իսկ ըստ էության կարող եմ ասելլ, որ մենք անհրաժեշտ չենք համարում մեր ընկերության հաճախորդներին զրկել ռոումինգից եւ նրանց կորուստային դրության մեջ դնել այլ օպերատորների հաճախորդների նկատմամբ»,- հայտնել է ընկերության հասարակայնության հետ կապերի Ծառայության ղեկավար Անուշ Բեգլոյանը: