Դավութօղլուն հերթական անգամ խոստացել է չհիասթափեցնել Ադրբեջանին

Tert.am.16-9-2009- Ինչպես արդեն գրել ենք, Թուրքիայում արդեն մեկնարկել են խորհրդարանական քննարկումները՝ կապված հայ–թուրքական Արձանագրությունների հետ։ Հիշեցնենք, որ Թուրքիայի ԱԳ նախարար Ահմեթ Դավութօղլուն արդեն հանդիպել է երկրի 3 կուսակցությունների առաջնորդների հետ՝ հայ-թուրքական հարաբերությունների բարելավման ընթացքի շուրջ բանակցելու նպատակով։ Ինչպես հաղոդրում է թուրքական Today’s Zaman-ը, երեք առաջնորդներն էլ պաշտոնական Երևանի և Անկարայի միջև հարաբերությունների բարելավման ընթացքը կապել են Լեռնային Ղարաբաղի հակամարտության կարգավորման հետ, սակայն, թերթի փոխանցմամբ, Դավութօղլուն շտապել է հանգստացնել նրանց։ Թուրքիայի ընդդիմադիր գործիչներն իրենց մտավախությունն են հայտնել արտգործնախարարին հայ-թուրքական սահմանի բացման շուրջ՝ ընդգծելով, որ սահմանի բացումն առանց Ադրբեջանի «գրավյալ» տարածքներից հայկական զորքերի դուրսբերման կխարխլի Թուրքիայի ազգային շահերը։ «Մենք որևիցե քայլ չենք ձեռնարկի, որը կվշտացնի մեր ադրբեջանցի եղբայրներին», – հերթական անգամ կրկնել է արտգործնախարարը։ Դավութօղլուի խոսքով՝ ադրբեջանցիներն անմիջապես տեղեկացվում են հայ–թուրքական բանակցային ընթացքի մասին։ Թուրքիայի «Հանրապետական ժողովրդական» կուսակցության առաջնորդ Դենիզ Բայքալը Դավութօղլուի հետ հանդիպումից հետո նշել է, որ վերապահումներով է մոտենում երկրի կառավարության նախաձեռնությանը՝ մասնավորապես ընդգծելով, որ պաշտոնական Երևանի և Անկարայի միջև նախաստորագրված Արձանագրություններում ոչ մի կետ չկա «Հայաստանի կողմից ԼՂ օկուպացմանը վերջ դնելու մասին»։ «Այնպիսի տպավորություն է ստեղծվում, որ ողջ գործընթացը գտնվում է հայկական կողմի վերահսկողության տակ։ Դա մեզ ձեռնտու չէ։ Այս գործընթացը պետք է դուրս գա հայկական կողմի վերահսկողությունից»,- նշել է մեկ այլ թուրք ընդդիմադիր։