ԱՐԴՅՈՔ ՈՎՔԵՐ ԵՆ

«Լրագիր» 11-9-2009- Փաստահավաք խմբի անդամներ Անդրանիկ Քոչարյանն ու Սեդա Սաֆարյանը նամակ են հղել Մարտի 1-ի դեպքերի ուսամնասիրման խորհրդարանական ժամանակավոր հանձնաժողովի նախագահ Սամվել Նիկոյանին, որում ասվում է. 'Ձեզ ենք ուղարկում տեսասկավառակ մեկ լուսանկարով` 2008թ. մարտի 1-ին ժամը 16.00-ից 17.00-ի սահմաններում, Մելիք Ադամյան փողոցում գտնվող բանակային զինվորական համազգեստով հանդերձավորված եւ ինքնաձիգերով զինված անձնաց պատկերներով: Մինչեւ Ժամանակավոր հանձնաժողովի վերջնական զեկույցի հրապարակումը, ակնկալում ենք, որ ԱԺ հանձնաժողովը կպարզի. - Արդյո՞ք բեռնատար մեքենայի մեջ գտնվող, ինքնաձիգերով զինված համազգեստավոր անձինք զինծառայողներ են: Եթե այո, ապա ՀՀ ԶՈՒ ո՞ր կառույցի եւ ո՞ր ստորաբաժանման մարտիկներ են: - Արդյո՞ք նույն լուսանկարի երկրորդ պլանում պատկերված դիմակավոր, սեւ համազգեստով զինված անձինք զինծառայող կամ ոստիկանական հատուկ նշանակության ջոկատային ստորաբաժանումների մարտիկներ են: Եթե այո, ապա ո՞ր ստորաբաժանումից են: Տեղեկացնում ենք, որ խնդրո առարկայի առնչությամբ Փաստահավաք խմբի՝ Ձեր ձեռքի տակ գտնվող փաստաթղթերում կան արժեքավոր նյութեր”: