Բաքու. Սարգսյանը Ալիևի առջև բարձրացնում է Քոչարյանի օրոք համաձայնեցված հարցերը

Tert.am- 17-10-2009- Հայաստանի և Ադրբեջանի ղեկավարների վերջին հանդիպման ժամանակ հայկական կողմը հանկարծակի սկսել է քննարկել այն հարցերը, որոնք համաձայնեցվել են դեռ երկու-երեք տարի առաջ։ Այդ մասին, ինչպես հայտնում է Trend News-ը, հայտարարել է երեկ Ադրբեջանի արտգործնախարար Էլմար Մամեդյարովը։ «Մենք հասկանում ենք, որ կա կանոն, ոչինչ չի համաձայնեցվել, քանի դեռ ամեն ինչ համաձայնեցված չէ։ Սակայն անհնար է առաջ շարժվել, երբ հետ ես նայում և սկսում քննարկել առաջարկներն ու գաղափարները, որոնք համաձայնեցվել են առնվազն երկու-երեք տարի առաջ»,- նշել է Մամեդյարովը։ Ըստ վերջինիս՝ հայկական կողմի նման արարքները կապված են տարածաշրջանում տեղի ունեցած դեպքերի, մասնավորապես՝ հայ-թուրքական մերձեցման հետ։ «Հայկական կողմը, հավանաբար, կարծում է, թե եթե այդ ուղղությամբ զարգանում է գործընթացը, ապա կարելի է սառեցնել մյուսները»,- նշել է Մամեդյարովը։ Ադրբեջանի ԱԳՆ ղեկավարը խորհուրդ է տվել ԵԱՀԿ Մինսկի խմբի համանախագահներին իրենց առաջիկա տարածաշրջան կատարելիք այցի ժամանակ «բացատրել Հայաստանին, որ իրենք չեն կարող բացել հարցերը, որոնք արդեն համաձայնեցված են։ Այլապես դա անվերջանալի գործընթաց կլինի»։