Թուրքիայի խորհրդարանը ընդունել է սահմանադրական բարեփոխումների առանցքային կետերից մեկը

News.am. 5-5-2010- Մայիսի 3-ին սահմանդրական բարեփոխումների կարեւոր 8-րդ կետի ձախողումից հետո մայիսի 4-ին Թուրքիայի խորհրդարանը 337 ձայնով ընդունել է եւս առանցքային համարվող 17-րդ կետը: Թուրքիայի իշխող «Արդարություն եւ զարգացում» կուսակցության կողմից նախաձեռնած սահմանադրական բարեփոխումների 17-րդ կետի քվեարկությանը մեծ լարվածությամբ էր սպասում Թուրքիայի վարչապետ Ռեջեփ Թայիփ Էրդողանը, ով մինչեւ վերջ հետեւել է հիշյալ կետի ընդունմանը: Ընդունումից անմիջապես հետո իշխող կուսակցության պատգամավորները չեն թաքցրել իրենց զգացմունքները եւ իրար շնորհավորել ու գրկախառնվել են: Սահմանդրական բարեփոխումների 17-րդ կետում նշվում է, որ Թուրքիայի Սահմանդրական դատարանի մշտական անդամների քանակը ներկայիս 11-ից պետք է հասնի 17-ի: Նշենք, որ մայիսի 3-ին իշխող կուսակցության առնվազն 8 պատգամավորի շնորհիվ մերժվել է սահմանադրական բարեփոխումների 8-րդ կետը, որը դժվարացնում էր կուսակցությունների փակումը իսկ փակման գործընթացի դեպքում փակման որոշումը պետք է անցներ խորհրդարանով: Թուրքիայում կուսակցությունների փակումը տեղի է ունենում հենց Սահմանադրական դատարանի միջոցով: Իշխող կուսակցությունը, ավելացնելով Սահմանադրական դատարանի մշտական անդամների քանակը, փորձում է իրեն ապահովել հնարավոր փակման վտանգից: 2008-ին Էրդողանի կուսակցությանը մեկ ձայնի առավելությամբ հաջողվեց խուսափել փակվելուց: