Հայաստանում ոչ մի շնաձուկ չպատժվեց, որբերի կյանքում ոչինչ չփոխվեց. Անահիտ Բախշյան

«Ժառանգություն» կուսակցության պատգամավոր Անահիտ Բախշյանն այսօր խորհրդարանական հայտարարությունների ժամին անդրադարձավ կոռուպցիայի խնդրին՝ նկատելով, որ «կոռուպցիայի շղթան, որը տասնյակ և ավելի տարիներ քաղցկեղի մետաստազների նման քայքայում է մեր պետության շատ խարխուլ հիմքերը»:
«Վերահսկիչ պալատի հաշվետվությունից բերված փաստերը խոսում են մանկատների շրջանավարտների և առանց խնամքի մնացած երեխաների ճակատագրերի նկատմամբ պետական մակարդակով հանցավոր անտարբերության մասին: Սա մեր կառավարության դեմքն է, նկարագիրը:
Մասնավորապես, հաշվետվության մեջ արձանագրված է, որ նշված ծրագրերից առաջինով 2007-2009թ.թ. ընթացքում պետական բյուջեով նախատեսվել է 1 մլրդ 178,5 մլն դրամ, որից միայն բնակարանների ձեռք բերման համար` 921.5 մլն դրամ (145 բնակարանի հաշվարկով), որից 01.08.2009 թ. դրությամբ ձեռք է բերվել 32 բնակարան` 224.8 մլն դրամ արժողությամբ, այսինքն՝ իրացվել է ամբողջ գումարի ընդամենը 24.4%-ը»,- ընդգծեց Բախշյանը։
Ըստ նրա՝ «Առանց ծնողական խնամքի մնացած երեխաների բնակարանի տրամադրման հետ կապված ծախսեր» ծրագրով 2007-2009թթ. ընթացքում նախատեսվել է 333.5 մլն դրամ, որի դիմաց 56-ի փոխարեն ձեռք է բերվել ընդամենը 8 բնակարան` 49.7 մլն դրամ արժողությամբ։ Այսինքն՝ իրացվել է ամբողջ գումարի 15%-ը:
«Այսպիսով, 2007-2009թթ. ընթացքում երկու ծրագրերի շրջանակներում պետք է գնվեր և բնակեցվեր 201 բնակարան, որի համար պետբյուջեով նախատեսված է եղել 1.512.2 մլն դրամ, մինչդեռ փաստացի ձեռք է բերվել 40 բնակարան, որի համար ծախսվել է ընդամենը 274.5 մլն դրամ կամ ծրագիրը կատարվել է 20%-ով:
Հաշվետվության մեջ առկա են փաստեր, լուսանկարներ, որոնք վկայում են գնված բնակարաններում մարդուն անհրաժեշտ տարրական պայմանների բացակայության մասին: Այսինքն, նույնիսկ ծախսված 20%-ը՝ 274.5 մլն դրամ, չի ծառայում աշխարհում ամենաթանկ բանից` ընտանեկան ջերմությունից զրկված երիտասարդներին: Այս բացահայտումները եղան, սակայն ոչ մի շնաձուկ չպատժվեց, որբերի կյանքում ոչինչ չփոխվեց։ Ավելին՝ 2010 - 2011թ.թ. պետական բյուջեով ոչինչ չի նախատեսված առ 2009թ. հուլիսի 1-ը ՀՀ-ում հաշվառված դեռևս 269 անօթևան շրջանավարտների համար:
Իսկ 2008-2009 թ.թ. բյուջետային միջոցներով, որն է 1.047.2 մլն դրամ, ոչ մի բնակարան չի գնվել: Այսինքն՝ այս գումարը պետությունը «խնայել է» որբերի հաշվին, իսկ մեր կարծիքով՝ դեռ պարտք է նրանց: Եվ քանի որ 2011 թվականի բյուջեով կառավարությունը սոցիալապես և հոգեպես ամենածանր վիճակում գտնվող այս խավի համար ոչինչ չի նախատեսել, ապա «Ժառանգությունն» առաջարկել է այդ գումարը հատկացնել 2011 թ. պետբյուջեով»,- հայտարարեց Բախշյանը։