Թուրքիայում քուրդ լրագրողը դատապարտվել է 138 տարվա ազատազրկման

Tert.am. 30-12-2010- Թուրքական դատարանը 138 տարվա ազատազրկման է դատապարտել քրդալեզու Azadiya Welat թերթի նախկին պատասխանատու խմբագիր Էմինե Դեմիրին։ Այս մասին տեղեկացնում է Firat գործակալությունը։

Լրատվամիջոցի տեղեկացմամբ՝ դատական նիստը տեղի է ունեցել Դիրաբեքիրի դատարանում, որին ներկա չի գտնվել Էմինեն։ Դատարանը հրահանգել է կալանավորել լրագրողին։
Էմինե Դեմիրը 2008-2009թթ. ընկած ժամանակահատվածում 84 նյութ է հրապարակել Azadiya Welat պարբերականում, ինչի համար Դիարբեքիրի դատարանը «Քրդստանի բանվորական կուսակցությանն (PKK) անդամակցելու» և «PKK–ի քարոզչությամբ զբաղվելու» մեղադրանքով 24-ամյա աղջկան յուրաքանչյուր նյութի համար մոտ 1,5–ական տարվա ազատազրկման է դատապարտել։