Լ. Զուրաբյան. «Մենք համարում ենք, որ մարտի 1-ի զոհերի բացահայտման պատրաստակամության վերաբերյալ պաշտոնական հավաստիացման մեր պահանջը կատարված է»

7or.am. 21-4-2011- 2011թ. ապրիլի 8–ի հանրահավաքի ժամանակ ՀԱԿ առաջնորդ Լևոն Տեր–Պետրոսյանը հայտարարել էր.

«Մենք ակնկալում ենք, որ մինչև հաջորդ հանրահավաքը, որ կկայանա ապրիլի 28-ին, հանուն երկխոսության մեր կողմից առաջ քաշված երեք նվազագույն պահանջները, որոնք են՝ քաղբանտարկյալների ազատ արձակումը, Ազատության հրապարակում հանրահավաքներ անցկացնելու իրավունքի վերականգնումը և մարտի 1-ի սպանությունները բացահայտելու պաշտոնական հավաստիացումը, կատարված պետք է լինեն։ Եթե դա տեղի չունենա, ապա Հայ Ազգային Կոնգրեսը, սպառված համարելով երկխոսության հնարավորությունը, հարկադրված է լինելու կտրուկ փոխել իր մարտավարությունն ու գործողությունների բնույթը։ Մենք դեռեւս հակված չենք իշխանության հետ վերջնագրի լեզվով խոսելու, բայց ժողովրդի համբերությունն էլ չափ ու սահման ունի։ Ապրիլի 28-ը պետք է դառնա կա՛մ երկխոսության սկզբնավորման, կա՛մ էլ՝ իշխանության ու հասարակության վերջնական ջրբաժանի օր»։
Արդեն ապրլի 20–ի երեկոյան ՀՀ նախագահ Սերժ Սարգսյանը դատաիրավական բարեփոխումների առանձին հարցերի վերաբերյալ խորհրդակցություն է հրավիրել և հայտարարել.
«Բազմիցս ասել եմ և հիմա էլ կրկնում եմ, որ սպասելիքները շատ են և, առաջին հերթին, խոսքս վերաբերում է մարտի մեկի դեպքերին: Ակնկալում եմ նոր թափ և ընդգծված ակտիվացում` նշված դեպքերի բացահայտման հարցում: Ես գիտեմ բոլոր խնդիրներն ու օբյեկտիվ պրոբլեմները, որ ունեցել ենք մենք բոլորս, նկատի ունեմ՝ իրավապահ մարմինները: Երևի ինձնից լավ որևէ մեկը տեղյակ չէ այդ պրոբլեմներին: Բայց պետք է մեկ անգամ ևս շեշտեմ, որ հարցի նշանակությունը չափազանց մեծ է և՛ մեր պետության, և՛ մեր հասարակության, և՛ նաև տարբեր շահարկումներից խուսափելու համար: Սա էլ է էական հանգամանք: Անձնապես ինձ համար սա շատ կարևոր հարց է, և ձեզ ուղղված իմ պահանջն է` կրկին և առավել մանրակրկիտ անդրադառնալ նույնիսկ այն հանգամանքներին, որտեղ ըստ ձեզ որևէ նոր բան չի կարող լինել: Փորձեք այդ դեպքերի բացահայտման նոր ուղիներ գտնել: Արդեն տևական ժամանակ է անցել, միգուցե, մարդիկ կան, ովքեր ականատես են եղել և այն ժամանակ չէին ուզում համագործակցել իրավապահ մարմինների հետ, իսկ հիմա այլ մոտեցումներ ունեն: Սա էլ է շատ հնարավոր»։
Այսօր առավոտյան «7օր»–ը կապ է հաստատել ՀԱԿ համակարգող Լևոն Զուրաբյանի, Լևոն Տեր–Պետրոսյանի մամուլի խոսնակ Արման Մուսինյանի և ՀՀՇ վարչության նախագահ Արամ Մանուկյանի հետ, որպեսզի պարզի՝ արդյո՞ք կարելի է համարել, որ Լևոն Տեր–Պետրոսյանի առաջարկած ՀԱԿ–իշխանություն երկխոսությունն արդեն սկսված է կամ առաջիկայում կսկսվի, քանի որ իշխանությունները, ըստ էության, նրանց 3 պահանջները կատարում են՝ քաղբանտարկյալներն ազատ են արձակվում, Ազատության հրապարակում ՀԱԿ–ը հանրահավաքներ է անցկացնում, իսկ մարտի 1-ի սպանությունները բացահայտելու պաշտոնական հավաստիացումը Սերժ Սարգսյանը երեկ տվեց։ ՀԱԿ այդ երեք անդամները, սակայն, առաջարկել են ավելի ուշ զանգահարել։
Փոխարենը, ՀԱԿ համակարգող Լևոն Զուրաբյանը «Չորրորդ ինքնիշխանություն» օրաթերթի հետ զրույցում մեկնաբանել է Սերժ Սարգսյանի հայտարարությունը և ասել.
«Մենք համարում ենք, որ մարտի 1-ի տասը զոհերի բացահայտման պատրաստակամության վերաբերյալ պաշտոնական հավաստիացման մեր պահանջը կատարված է»:
Այսինքն, ապրիլի 28-ը «վերջնական ջրբաժանի օր» չի՞ լինի, հետաքրքրվել է օրաթերթի թղթակիցը:
«Մենք հստակ հայտարարել ենք, որ ապրիլի 28-ն պետք է երեք պահանջը կատարված լինի, որպեսզի երկխոսության սկզբնավորման հիմք դրվի», – ասել է Լևոն Զուրաբյանը: