Panorama.am. 22-6-2011- Թուրքիայի մամուլը լայնորեն մեկնաբանել է Ադրբեջանի ընդդիմության «Հանրային պալատ» միավորման կողմից հունիսի 19-ին Բաքվում անցկացված զանգվածային բողոքի ակցիաները:«Ազադլիգ» թերթը գրում է, որ ազդեցիկ «CNN Turk» հեռուստաալիքը, «Dunya Times», «World bulletin» և այլ ճանաչված լրատվական պարբերականներ մեծ ուշադրություն են հատկացրել այդ ակցիային: «CNN Turk»-ը հունիսի 19-ին նվիրված հաղորդումը հեռարձակել է «Ադրբեջանում գործերը խառն են», «Dunya Times»-ը` «Արաբական գարունը թափանցել է Ադրբեջան», «World bulletin»-ը` «Ադրբեջանում ընդդիմությունն արգելված է» առաջնորդողներով:
Այդ հրապարակումներում ասվում է, որ Ադրբեջանում ընդդիմադիր կուսակցությունների և հասարակական ակտիվիստների ստեղծած Հանրային պալատի` հունիսի 19-ին անցկացրած ակցիայի նախօրեին իշխանական ուժերը մայրաքաղաք Բաքվում աշխատանքի արտակարգ ռեժիմի են անցել: Նրանք շրջափակել են Բաքվի կենտրոնական փողոցներն ու հրապարակները և սահմանափակել քաղաքացիների ազատ շարժվելու հնարավորությունները:
Հունիսի 19-ի հետ կապված ռեպորտաժում նշվում է, որ Հանրային պալատի կողմնակիցները հավաքվել են ոչ միայն իշխանական ուժերի սպասած` Նարիմանովի հրապարակում, այլ միևնույն ժամանակ, Բաքվի տարբեր վայրերում և հակաիշխանական կարգախոսներ հնչեցրել: Նրանք պահանջել են վերականգնել ազատ հավաքվելու իրենց իրավունքը, ազատ արձակել քաղբանտարկյալներին և երկրում քաղաքական բարեփոխումներ իրագործել:
Թուրքական մամուլը հայտնել է, որ չնայած ընդդիմության բազմիցս բարձրաձայնած պահանջներին, Ադրբեջանի իշխանությունը թույլ չի տվել խաղաղ ակցիաներ անցկացնել պահանջված վայրերում:
«Չնայած իշխանության բոլոր արգելքներին, Ադրբեջանի ընդդիմությունը կրկին ակցիաներ է անցկացրել իր համար ցանկալի վայրերում: Անվտանգության ուժերը ընդդիմության կողմնակիցների դեմ բռնություններ են գործադրել: Տասնյակ ընդդիմադիրներ ձերբակալվել են»,- հայտնել է թուրքական մամուլը:
Tehran Time
Yerevan Time
No comments:
Post a Comment