Դինքին սպանած Սամասթի գործով դատական նիստը հետաձգվել է

Tert.am. 29-6-2011- Այսօր Ստամբուլի անչափահասների գործերը քննող քրեական դատարանում տեղի է ունեցել «Ակօս» շաբաթաթերթի խմբագրապետ Հրանտ Դինքին սպանած Օգյուն Սամասթի գործով հերթական դատական նիստը, որը հետաձգվել է մինչև հուլիսի 25-ը։ Այս մասին տեղեկացնում է թուրքական «Ջիհան» գործակալությունը։
Ինչպես ավելի վաղ տեղեկացրել էինք, սպասվում էր, որ այսօր դատարանը կկայացնի մարդասպան Սամասթի գործով դատավճիռը։
Հիշեցնենք, որ նախորդ նիստին Ստամբուլի դատախազ Ալի Դեմիրը պահանջել էր Օգյուն Սամասթին հանցագործությունն իրականացնելու պահին անչափահաս լինելու պատճառով «ծրագրված սպանություն իրականացնելու» և «անօրինական զենք պահելու» մեղադրանքներով դատապարտել 19-ից մինչև 27 տարվա ազատազրկման։