Եթե երեք նախագահներն էլ չեն ճանաչել Ղարաբաղը՝ կա օբյեկտիվ պատճառ. Լևոն Տեր Պետրոսյան

Tert.am. 23-6-2011- ՀՀ առաջին նախագահ Լևոն Տեր-Պետրոսյանը ռուսական Московские новости թերթին տված հարցազրույցում պատասխանելով այն հարցին, թե ինչու Հայաստանը մինչև այժմ չի ճանաչել Լեռնային Ղարաբաղի անկախությունը, ասել է. «Այս հարցը դուրս է սուբյեկտիվ ցանկությունների շրջանակից։ Հայաստանի բոլոր երեք նախագահները չեն ճանաչել։ Նշանակում է՝ կա օբյեկտիվ պատճառ։ Նրանք ասում են չէ՞, որ իրենք հայրենասեր են, որ իրենք Ղարաբաղի կողմից են։ Այդ ինձ կարող էին չճանաչելու համար մեղադրել դավաճանության մեջ»։
Տեր-Պետրոսյանը գոհունակություն է հայտնել, որ իրեն հաջորդած նախագահների «խելքը նույնպես հերիքում է» չանել այդպիսի անզգույշ քայլ։
«Նախ, դա ոչ մի օգուտ չի տա ,- պարզաբանել է Տեր-Պետրոսյանը։ - Հայաստանը կլինի միակ երկիրը, որը կճանաչի այն, ինչպես Հյուսիսային Կիպրոսի դեպքում է։ Թուրքիան դրանից չի տուժի, իսկ Հայաստանն այդ ձևական դեմոնստրատիվ քայլից կարող է տուժել։ Դա կապացուցի, որ Հայաստանը մաքսիմալիստ է և ոչ մի փոխզիջման չի գնում»։
Նա հիշեցրել է, որ ամբողջ ղարաբաղյան քաղաքականությունը մինչև այժմ, թեկուզ միայն խոսքերով, հիմնված է եղել այն բանի վրա, որ հայկական կողմը փոխզիջման տարբերակ է փնտրում, իսկ ճանաչելով Լեռնային Ղարաբաղը՝ մենք կհրաժարվեինք այդ սկզբունքներից։

«Անմիջապես ավարտվում են բանակցությունները, և անմիջապես Ադրբեջանի համար միակ այլընտրանք է մնում հարցը լուծել ուժային ճանապարհով։ Եվ այս դեպքում, ես ձեզ հավատացնում եմ, միջազգային հանրության համակրանքը կլինի Ադրբեջանի կողմը»։