ԵԽԽՎ–ն հիասթափված է կազանյան հանդիպումից. Մևլութ Չավուշօղլու

Tert.am. 29-6-2011- Եվրոպայի խորհրդի Խորհրդարանական վեհաժողովը (ԵԽԽՎ) շարունակելու է աջակցել Հայաստանի և Ադրբեջանի միջև երկխոսությանը՝ հուսալով, որ ապագայում այդ երկխոսությունը կուղեկցվի կոնկրետ արդյունքներով։ Այս մասին Trend–ին ասել է ԵԽԽՎ նախագահ Մևլութ Չավուշօղլուն։
Անդրադառնալով Կազանում Հայաստանի, Ռուսաստանի և Ադրբեջանի նախագահների հանդիպմանը՝ Չավուշօղլուն նշել է, որ ԵԽԽՎ–ի մոտ հիասթափություն է առաջացրել այն հանգամանքը, որ հանդիպմանը կողմերին այդպես էլ չհաջողվեց հասնել պայմանավորվածությունների։
«ԵԽԽՎ–ն, իհարկե, աջակցում է Հայաստանի և Ադրբեջանի միջև երկխոսությանը։ Մենք աջակցում ենք երկու երկրների նախագահների միջև Ռուսաստանի առաջնորդի նախագահությամբ իրականացվող հանդիպումների շարունակությանը»,– ասել է Չավուշօղլուն։