Ռուսաստանում Իրանի դեսպան. Իրանի «նվաճման» դեպքում Ռուսաստանը կզրկվի հարավային պաշտպանությունից

News.am. 16-2-2012- Իրանի «նվաճման» դեպքում արեւմտյան երկրների կողմից բացվելու է հակառուսական լայն ճակատ: Այդ մասին, այսօր` փետրվարի 16-ին, Մոսկվայում կայացած ճեպազրույցի ժամանակ հայտնել է Ռուսաստանում Իրանի դեսպան Մահմուդ Ռեզա Սաջադին` հիշեցնելով, որ ոչ ոքի համար գաղտնիք չէ, որ Իրանը հարավից պաշտպանում է Ռուսաստանին: Այդուհանդերձ դեսպանը հայտարարել է, որ նրա երկիրը պատրաստ է դիմակայել ցանկացած ռազմական հարվածի, եւս մեկ անգամ հավաստիացնելով, որ Թեհրանը մշակում է իր միջուկային ծրագիրը բացառապես խաղաղ նպատակներով` բնակիչներին էլեկտրաէներգիայով ապահովվելու նպատակով: Սաջադին նաեւ հայտարարել է, որ ԵՄ երկրներ իրանական նավթի ներմուծան արգելքը դրվել է անորոշ ժամկետով: «Եվրոպան սխալ է թույլ տվել` քաղաքականացնելով էներգետիկ հարցը: Եթե էմբարգոյի մասին կարող են հայտարարել նավթը ստացողները, ապա դա կարող են անել նաեւ նավթ մատարարողները: Դա քաղաքական խաղ է, իսկ պարտված կողմը` էլեկտրաէներգիա ստացողներն են»,-ասել է դեսպանը, հաղորդում է «Ուտրո.ռու»-ն: