Ինչո՞ւ են դժգոհ ռուսները

1in.am. 16-5-2012- Սերժ Սարգսյանը երեկ Մոսկվայում մասնակցել է ՀԱՊԿ և ԱՊՀ հիմնադրման հոբելյանական միջոցառումներին: Սակայն մոսկովյան այցի գլխավոր ինտրիգն, իհարկե, այն էր, թե արդյոք Սարգսյանը առանձնազրույց, հանդիպում ունենալու է ՌԴ նոր նախագահ Վլադիմիր Պուտինի հետ, թե ոչ: Այս մասին պաշտոնական հաղորդագրություն երեկ ողջ օրվա ընթացքում այդպես էլ չստացվեց: Փոխարենը հաղորդագրություն եղավ այն մասին, որ Սերժ Սարգսյանը հանդիպել է ՌԴ նորանշանակ վարչապետ, նախկին նախագահ Դմիտրի Մեդվեդևի հետ, որը, ինչպես հայտնի է, տեղերով փոխվել է Պուտինի հետ: Այս հանդիպումն իսկապես ուշագրավ է, սակայն ոչ թե քննարկված հարցերի բովանդակության, այլ զուտ հենց արձանագրային տեսանկյունից: Բանն այն է, որ Սերժ Սարգսյանը, լինելով նախագահ և ժամանելով Մոսկվա, առաջինը հանդիպում է ունենում ոչ թե այդ երկրի նախագահի, այսինքն` իր պաշտոնին համարժեք պաշտոնյայի, այլ վարչապետի հետ: Ընդ որում` եթե նկատի ունենանք նաև, որ վարչապետն էլ մի գործիչ է, որը առավել հայտնի դարձավ երևի թե իր` այսպես ասած խամաճիկությամբ և կամակատարությամբ, քան ինքնուրույն քաղաքական կենսագրությամբ և գործոնով, ապա ստացվում է Սերժ Սարգսյանի համար, մեղմ ասած, տհաճ պատկեր: Բանն այն է, որ Պուտինն այդպիսով, ըստ էության, որոշակի վերաբերմունք է ցուցաբերել Սարգսյանի հանդեպ` անձամբ չհանդիպելով նրան, այլ այսպես ասած` ուղարկելով Մեդվեդևի մոտ: Պուտինն, ըստ երևույթին, դժգոհ է ինչ-որ բանից, և հավանաբար հենց օրերս ավարտված խորհրդարանի ընտրության արդյունքից, որում Հանրապետականը բացարձակ պարտության մատնեց ԲՀԿ-ՀՅԴ-Կոնգրես եռյակին: Իսկ որ այդ եռյակն ակնհայտորեն խաղում էր ռուսական դաշտում, երևի թե տեսանելի էր անգամ անզեն աչքով: Այլ կերպ ասած` Հայաստանի նոր խորհրդարանն, ըստ երևույթին, Ռուսաստանի սրտով չէ: Թող տարօրինակ չթվա, սակայն սա երևի թե խորհրդարանական ընտրությունների եզակի դրական արդյունքներից մեկը կարելի է համարել` նկատի ունենալով այն, որ Հայաստանը Ռուսաստանի, ըստ էության, կործանարար գերիշխանությունից դուրս բերելն ու որոշակիորեն ինքնիշխան, հավասարակշռված արտաքին հարաբերություններ ունեցող պետություն դարձնելը ռազմավարական խնդիր է Հայաստանի և հայ ժողովրդի համար: Եվ փաստորեն նոր խորհրդարանով Սերժ Սարգսյանը կամա, թե ակամա ինչ-որ փոքր քայլ է կատարում այդ ուղղությամբ, ինչն էլ ըստ էության հարուցել է ռուսների դժգոհությունը: Փոխարենը այդ քայլը Հայաստանի հասարակական-քաղաքական ակտիվ շրջանակների համար գոնե մի փոքր առիթ է խորհրդարանի ընտրությունից մի քիչ գոհ լինելու համար, քանի որ դա բխում է Հայաստանի պետական շահից: