«ԱԶԱՏՈՒԹՅՈՒՆ», Ռ/Կ. 17.04.08: Իրենց ամուսիններին քաղբանտարկյալներ համարող մի քանի տասնյակ կանայք այսօր կրկին բողոքի ցույց էին կազմակերպել Եվրախորհրդի երեւանյան գրասենյակի մոտ` պահանջելով ազատ արձակել բոլոր հետընտրական շրջանում կալանավորվածներին:Իրենց բողոքի ակցիաները ցուցարարները սկսել էին շաբաթասկզբին Եվրախորհրդի երեւանյան գրասենյակի մոտ, եւ հետագա օրերին շարունակել Ֆրանսիայի եւ Գերմանիայի դեսպանատների մոտ:
Կալանավորվածների կանայք ցանկանում էին հանդիպել Եվրախորհրդի երեւանյան գրասենյակի ղեկավար Բոյանա Ուռումովայի հետ` կալանավորվածներին ազատ արձակելու պահանջով եւ մարտի 1-ի եւ 2-ի իրադարձությունների անկախ հետաքննության ակնկալիքով իրենց նամակը անհապաղ Ստրասբուրգ ուղարկելու խնդրանքով:
Հանդիպումը Ուռումովայի հետ չկայացավ, սակայն գրասենյակի աշխատակիցներից մեկը խոստացավ հենց այսօր ուղարկել նամակը:
Ավելի ուշ ցուցարարները գնացին Հայաստանում Միացյալ Նահանգների դեսպանատուն եւ նամակ փոխանցեցին Կոնգրեսի Հելսինկյան հանձնախմբում այսօր սպասվող Հայաստանի վերաբերյալ լսումներին ընդառաջ: Հայաստանի նախկին արտգործնախարար Ալեքսանդր Արզումանյանի տիկինը` Մելիսա Բրաունը, «Ազատություն» ռադիոկայանին ասաց, որ ցուցարարներից ոմանց ընդունել է եւ նրանց հետ զրուցել է ամերիկացի դիվանագետներից մեկը: Զրույցում հիմնականում արծարծվել է կալանավորվածների առողջական վիճակը: Ամերիկացի դիվանագետը խոստացել է կանանց հանձնած նամակը փոխանցել Վաշինգտոն` լսումներին մասնակցող Մեթյու Բրայզային:
Tehran Time
Yerevan Time
No comments:
Post a Comment